Paşinyan bildirib ki, Zəngəzur dəhlizi məsələsi Ermənistan qanunvericiliyi çərçivəsində həllini tapacaq
“Belə görünür ki, bir çox məsələlərin nizamlanması hələ açıq qalır. Biz çərçivə sülh sazişi imzalasaq, sadəcə, hansısa mərhələni keçmiş olacağıq. Sənədin imzalanması post-konflikt dövrü üçün bir zəmin yaradır”
“Hər gün sülh müqaviləsi imzalamaq üçün gözəl fürsətdir”.
Bunu Ermənistan Baş naziri Nikol Paşinyan noyabrda Bakıda keçiriləcək COP29-un sülh müqaviləsinin imzalanması üçün əla fürsət olması ilə bağlı bəyanatları şərh edərkən bildirib.
Sülh müqaviləsinin mətni üzrə razılığa gəlməyin vacibliyinə diqqət çəkən Paşinyan əlavə olaraq qeyd edib ki, bu razılaşma 2022-ci il oktyabrın 6-da Praqada, sonra Soçidə, Brüsseldə əldə olunub: “Əsas prinsiplər razılaşdırılıb, onların sülh müqaviləsinin mətnində əks etdirilməsi qalır. Hesab edirəm ki, bizim bu işi tez bir zamanda başa çatdırmaq imkanımız var. Görəndə ki, bu iş başa çatıb, nəticələr yekunlaşıb və biz imzalamaya keçməliyik, yeri və vaxtı müəyyən etmək daha sonra müzakirə olunacaq başqa bir məsələdir. Mən deyə bilərəm ki, indi bizdə ab-havada ciddi dəyişiklik var, lakin bu, finişə çatdığımız anlamına gəlmir.
Siyasi şərhçi Azər Rəşidoğlu “Sherg.az"a açıqlamasında deyib ki, söhbət Sülh Bəyannaməsindən yox, Çərçivə Sülh Sazişindən gedir. Bu sənəddə nizamlanmanın prinsipləri əks olunub:
“Azərbaycan nizamlanma üzrə beş prinsip təklif edib və Ermənistan öz mövqeyini açıqlayıb. İndi həll olunmamış bir məsələ qalıb. Yəni Ermənistan Azərbaycanın ərazi bütövlüyünü tanımalıdır. Ermənistan çoxtərəfli sənədlərə istinadən Azərbaycanın ərazi bütövlüyünü tanıyıb. Ermənistan Praqada Almatı Sazişinə və BMT Nizamnaməsinə istinadən Azərbaycanın ərazi bütövlüyünü tanıdığını bəyan edib. Münaqişə iki ölkə arasında olduğundan ərazi bütövlüyü məsələsi ikitərəfli sənəddə də öz əksini tapmalıdır. Çərçivə sülh sazişinin imzalanması üçün şərait yaranıb. Amma sazişin imzalanması vaxt aparacaq. Burada sərhədlərin delimitasiyası, demorkasiyası prosesi var, kommunikasiyaların bərpası və açılması məsələsi var. Paşinyan bildirib ki, Zəngəzur dəhlizi məsələsi Ermənistan qanunvericiliyi çərçivəsində həllini tapacaq. Belə görünür ki, bir çox məsələlərin nizamlanması hələ açıq qalır. Biz çərçivə sülh sazişi imzalasaq, sadəcə, hansısa mərhələni keçmiş olacağıq. Sənədin imzalanması post-konflikt dövrü üçün bir zəmin yaradır. Yəni məsələlərin həlli üçün prinsiplər müəyyən edilmiş olur. Əlbəttə ki, kənar təsirlər də mövcuddur. Kənar təsirlər olmasa, çərçivə sazişinin COP29-a qədər imzalanması daha real olardı”.
