Vladimir Zelenski Yaponiyanın "Kyodo" agentliyinə verdiyi müsahibədə etiraf edib ki, Ukrayna Silahlı Qüvvələri itirilmiş əraziləri geri qaytarmaq iqtidarında deyil.
“Ordumuzun buna gücü çatmır, bu doğrudur”, – deyə o, müvafiq sualı cavablandırıb. Zelenski həmçinin əlavə edib ki, Ukraynadakı münaqişə “çətin dövrə” daxil olub.
Qeyd edək ki, Zelenski əvvəllər israr edirdi ki, Ukrayna münaqişəni 1991-ci il sərhədlərinə qayıdana qədər davam etdirməlidir. Lakin son həftələrdə həm o, həm də onun ofisinin rəhbəri Andrey Yermak bunun mümkün olmadığını etiraf etməyə başlayıblar.
Sözügedən açıqlamanı "Sherg.az" üçün dəyərləndirən siyasi analitik Fuad Abbasov bildirib ki, Ukraynada iki qütb arasında müharibə gedir:
“ABŞ-ın başçılıq etdiyi Qərb bloku ilə Rusiya mərkəzli Şərq bloku Ukraynada mübarizə aparır. Soyuq müharibə dövründə Koreyada, Əfqanıstanda və Vyetnamda olduğu kimi. Qeyd edim ki, Əfqanıstan müharibəsində əfqanlar, Vyetnam müharibəsində isə vyetnamlılar nə qədər döyüşkən xalq olsalar da, onlara rəqiblərini zəiflətməyə çalışan iki güc mərkəzindən birinin dəstəyi olmasaydı, özlərindən qat-qat güclü ordulara qarşı dayana bilməzdilər. Zelenski də yaxşı başa düşür ki, sərhədlərin 1991-ci il vəziyyətinə qaytarılması qeyri-mümkündür. Hətta sərhədlərin müharibədən əvvəlki vəziyyətinə gətirilməsi də olduqca çətindir. Çünki Rusiya qan tökülən Luqansk, Donetsk, hətta Odessanı da əlində saxlamağa cəhd edəcək”.
