“Uran zənginləşdirilməsi məsələsi ABŞ ilə heç bir şəraitdə müzakirə edilə bilməz”.
Teleqraf xəbər verir ki, bunu İran parlamentinin Milli Təhlükəsizlik Komitəsinin sədr müavini Abbas Müqtədayi deyib.
“Qərbin guya İranda uranın zənginləşdirilməsi ilə bağlı narahatlıqlarını dilə gətirdiyi şey, mahiyyət etibarilə, İran xalqının müstəqilliyi və inkişafının qarşısını almaq cəhdidir. İran xalqı yaxşı dərk etməlidir ki, (nüvə proqramı ilə bağlı) hazırkı nailiyyətlər böyük səylərin nəticəsidir və bütün gücümüzlə qorunmalıdır. İran millətinin mənafeyini təmin edə bilməmiz üçün diplomatiyanın qapısını açıq saxlamaq məqsədi ilə də danışıqlar aparılır. Biz dəfələrlə vurğulamışıq ki, bizim nüvə məqsədlərimiz tamamilə dinc xarakter daşıyır və istismar bu çərçivədə baş verəcək”, - sədr müavini bildirib.
Abbas Müqtədayi Qərb ölkələrini ikili standartlara yol verməkdə ittiham edib:
“Onların (qərblilərin) davranışları aldadıcı və ikiüzlüdür. İrana nüvə silahının arxasınca getməməsi barədə xəbərdarlıq edən ölkələrin özlərinin böyük nüvə silahı ehtiyatları var və bəzi hallarda, ABŞ kimi, onlardan hətta döyüş meydanında istifadə ediblər”.
Xatırladaq ki, ABŞ prezidentinin xüsusi nümayəndəsi Stiven Uitkoff bundan əvvəl Vaşinqtonun Tehrandan uranın zənginləşdirilməsi və ya nüvə proqramından tamamilə imtina etməsini tələb etdiyini açıqlayıb. Oxşar açıqlama ABŞ Prezidenti Donald Tramp tərəfindən də verilib.
