Telman Nüsrətoğlu: “Köçəryan və erməni kilsəsi Rusiyanın Ermənistandakı alternatividir”
Ermənistanın Baş naziri Paşinyan və Rusiya Prezidenti Putin arasında telefon danışığı olub. Ermənistan Nazirlər Kabinetinin məlumatına görə, Nikol Paşinyan və Vladimir Putin telefon danışığı əsnasında ikitərəfli və regional gündəliyin məsələlərini müzakirə ediblər. Qeyd edək ki, bundan öncə Putin Paşinyanı 50 illik yubileyi münasibətilə təbrik etmişdi. Putin iki ölkəni "tarixi dostluq münasibətlərinin" birləşdirdiyini demişdi. Putin Moskva ilə İrəvanın “birgə səylərlə bütün istiqamətlərdə əməkdaşlığın daha da inkişafını təmin edə biləcəyinə” əminliyini ifadə etmişdi. Xatırladaq ki, may ayında Rusiya xarici işlər naziri Sergey Lavrovun Ermənistana səfəri zamanı həm Paşinyanla, həm də həmkarı A.Mirzoyanla ikitərəfli əlaqələr, regional məsələlər müzakirə edilib.
Siyasi şərhçi, tarix elmləri doktoru Telman Nüsrətoğlu "Sherg.az"a deyib ki, Ermənistan Baş naziri Nikol Paşinyanın yeni yaranmış geosiyasi şəraitdə vəziyyəti heç də yaxşı deyil. Analitik vurğulayıb ki, Paşinyan hökuməti Qərbdən, Avropadan arzuladığı dəstəyi ala bilmir:
"Cənubi Qafqazda Azərbaycan və ümumən türk dünyasının Avropa ölkələri nəzdində mövqeyi yüksəlir, strateji önəmi artır. Rusiyanın üzləşdiyi geosiyasi problemlər, Ukrayna ilə müharibə fonunda Moskvanın yeni dünya düzənində özünə yer tapma arayışları da gündəmdədir. Ümumən, Rusiya və Ermənistan arasında son günlərdə münasibətlər bir qədər normallaşıb. Əslində, Ermənistan Rusiya ilə münasibətlərini heç vaxt pozmamışdı. Sadəcə, yaranmış vəziyyətə uyğun olaraq Avropa ölkələrindən daha çox qoparmaq, əlavə imkanlar əldə etmək məqsədi güdürdü. Rusiyanın Ermənistan üzərində ciddi siyasi, iqtisadi, hərbi təsirlərinin olmasını unutmamaq lazımdır. Yəni dünyaya təqdim edilən gərginlik hər iki tərəfin maraqlarına xidmət edən gərginlik olub. Rusiya hərbi sənayesindən tutmuş digər sənaye istiqamətlərində ehtiyac duyduğu detalları Ermənistan üzərindən əldə edib və sanksiyalardan yayınıb. Ermənistan da bu dövr ərzində Rusiyaya olan ixracatını artırıb".
T. Nüsrətoğlu əlavə edib ki, Rusiyanın bölgədəki siyasəti sadəcə Paşinyanla bağlı deyil:
"Rusiya bir neçə qruplar, bir neçə təsir rıçaqları üzərindən siyasət icra etməkdədir. Ermənistanda Rusiyanın Paşinyana alternativi Köçəryan cəbhəsidir. Bundan başqa, erməni kilsəsi və kilsəyə bağlı güc mərkəzləri də önəmli şəbəkə sayılır. Rusiyanın tələblərinin qəbul edilməməsi şəraitində istənilən vaxt alternativ qüvvələr daha da fəallaşdırıla bilər. Artıq bunun elementləri görünür. Ermənistan daxilində Köçəryan cəbhəsinin siyasi fəallığı artmaqdadır. Yəni Paşinyanın mövqeyinin kifayət qədər kövrək olduğu ortadadır. Çünki Paşinyan gələn il keçiriləcək seçkilərdə qələbə qazanmaq istəyir".
