"Dünyanın üzləşdiyi qlobal problemlər və çağırışlar dövlətlərarası səmimi və etibarlı münasibələri zərurətə çevrir. Hərtərfli əməkdaşlıq isə praqmatik diplomatiyadan, mədəni və humanitar əlaqələrin inkişafından və davamlı dialoqdan keçir. Azərbaycan da ənənəvi olaraq müxtəlif regionlar arasında dialoqun təşviqinə xidmət edərək, xarici siyasətində və dövlətlərlə əlaqələrində qarşılıqlı səmimi münasibətlərə üstünlük verir".
Bu sözləri Sherg.az-a açıqlamasında siyasi şərhçi Elmir Səftərov Azərbaycan-Çin münasibətlərini şərh edərkən söyləyib.
Onun sözlərinə görə, Azərbaycan və Çin dövlətinin başçıları da səmimi və dostluq şəraitində bu əlaqələri daha da irəliyə aparmaq üçün zəmin hazırlayırlar:
"Diplomatik münasibətlərin qurulmasından keçən 33 il ərzində Azərbaycan-Çin əlaqələrinin inkişafında ciddi nailiyyətləri əldə olunub, bu da siyasi qarşılıqlı etimadı möhkəmləndirib, hərtərəfli əməkdaşlığın genişlənməsinə təkan verib. Ölkələr praktiki əməkdaşlığı təşviq edərək, beynəlxalq və regional təşkilatlarda kommunikasiyanı dəstəkləyir. Həmçinin mütəmadi olaraq siyasi məsləhətləşmələr həyata keçirirlər. Hər iki tərəf dövlət suverenliyinin, təhlükəsizliyinin və ərazi bütövlüyünün qorunmasında bir-birini qətiyyətlə dəstəkləyib.
Azərbaycan və Çin “Bir kəmər və yol” təşəbbüsünün birgə tikintisi ilə Azərbaycanın “İpək Yolunun Dirçəldilməsi” milli inkişaf strategiyası ilə 2030-cu ilədək iqtisadi və sosial inkişaf strategiyası arasında əlaqəni gücləndirmək barədə razılığa gəlmələri uzunmüddətli əməkdaşlığa öz töhfəsini verəcək. Tərəflər arasında böyük potensiala malik sənaye, turizm, kənd təsərrüfatı, rəqəmsal transformasiyaslar, neft-kimya, metallurgiya, toxuculuq, əczaçılıq, maşın və avadanlıqlar, bərpa olunan enerji və digər sahələrində əməkdaşlığı möhkəmləndirir və genişləndirir".
Analitik vurğulayıb ki, ölkələrimiz mədəniyyət, incəsənət və təhsil sahələrində də əməkdaşlığı təşviq edir, qarşılıqlı mədəniyyət günlərini keçirir:
"Bu isə xalqlar qarşılıqlı anlaşmanı gücləndirir, sivilizasiyalararası mübadiləni təşviq edir. İyun ayında Azərbaycanla Çin arasında viza rejiminin ləğvinin təsdiqlənməsi də qarşılıqlı mübadilə və əməkdaşlığı təşviq edən məsələlərdəndir".
