Ancaq onun impiçmentlə vəzifəsindən kənarlaşdırılması real deyil
Fransa Milli Assambleyası Aşağı Palatasının Ali Kollegial orqanı ölkə Prezidenti Emmanuel Makrona qarşı impiçment prosedurunun başlanmasına dair qətnamə layihəsini təsdiqləyib. 22 nəfər üzvdən ibarət Ali Kollegial orqanın 12 nəfəri qətnamənin lehinə səs verib, hansı ki, həmin o 12 nəfər solçudur və Makronun hakimiyyətdən uzaqlaşmasını məhz bu siyasi qrup irəli sürüb. Makronun hakimiyyətdən uzaqlaşdırılmasını keçmiş Fransa Prezidenti Fransua Oland da daxil olmaqla 81 deputat dəstəkləyir. Solçuların Makronun impiçmenti ilə çıxış etmə səbəbi kimi, "Yeni Xalq Cəbhəsi"nin baş nazir vəzifəsinə təklif etdiyi Lyusi Kaste namizədliyinin Makron tərəfindən rədd edilməsi göstərilir.
Siyasi şərhçi Vüqar Dadaşov “Sherg.az"a açıqlamasında deyib ki, Emmanuel Makronun impiçmentinin baş tutması mümkün deyil. O bildirib ki, Makronun həm ölkə daxilində, kaloniyalarında, xarici siyasətində və hətta Avropa Birliyi ilə bağlı siyasətində böyük narazılıqlara və nüfuzunun çox aşağı olmamasına baxmayaraq, Fransa dövləti Makronu bu şəkildə vəzifəsindən kənarlaşdırmayacaq:
“İmpiçment baş tutarsa, hakim elita bütünlüklə tənqid olunan Fransanın rəsmi siyasətinin uğursuzluğunu etiraf etmiş olur. Makron siyasətinin uğursuzluğu hakim siyasi dairənin, elitanın uğursuzluğudur. Bunu isə təkcə Makronun belinə yıxmaq mümkün deyil. Əslində, Makronun vəzifəsindən kənarlaşdırılmağı xeyli müddət əvvəl, onun korrupsiya və lobbiçilik ittihamları ilə daha mümkün görünürdü. Əlbəttə ki, Fransa dövləti prezidentə qarşı bu ittihamlardan istifadə etmədi o hesaba ki, Fransa BMT TŞ-nin daimi üzvü kimi, beynəlxalq nüfuzuna, imicinə xələl gəlməsin.
Düşünürəm ki, Makrona qarşı impiçment proseduru əslində, gələcək prezident seçkiləri üçün solçu qruplarının hazırlıqlarıdır. Bu prosedurda isə Makrona hakimiyyətini qorumaq üçün imkan veriləcək, hərçənd ki, heç bir nəticəni tam istisna etmək olmaz”.
