Mitinqlər, aksiyalar mənasızdır, Kreml bu ölkədən əlini üzməyəcək
Son günlər Ermənistanda Rusiya əleyhinə etirazlar baş qaldırıb.
Ermənistanın Gümrü şəhərində də Rusiyaya və KTMT-yə qarşı aksiya keçirilib.
Ermənistan parlamentinin keçmiş deputatı Naira Zöhrabyan sosial şəbəkə hesabında yazıb. O bildirib ki, aksiya iştirakçıları ölkənin KTMT-dən çıxmasını tələb ediblər və Rusiyaya qarşı şüarlar səsləndiriblər.
Qeyd edək ki, Ermənistan hakimiyyəti siyasi istiqaməti ciddi şəkildə dəyişərək, Rusiyanın orbitindən çıxmaq kursu götürüb. Bunun üçünsə Rusiyaya qarşı ictimai narazılığı körükləyir.
"Sherg.az"a danışan politoloq Qabil Hüseynlinin sözlərinə görə, Ermənistanın reallıqda Rusiyaya nəsə etməyə gücü və imkanı yoxdur: "Rusiyanın Gümrüdə hərbi bazası var. Ermənilər rusları hədələyirlər ki, guya, bazanı bağlayacaqlar. Amma reallıqda heç nə edən deyillər. Çünki Ermənistanın nəinki indiki, hətta gələcək vəziyyəti və mövcudluğu da Rusiyanın hərəkətlərindən asılıdır. Yəni Ermənistan Rusiyadan o dərəcədə asılıdır ki, bu ölkəyə qarşı heç nə edə bilməz. İndi də gənclərin mitinqini keçirməklə, sadəcə, süni ab-hava yaradırlar. Bildirirlər ki, guya, inciyiblər, guya KTMT-dən, Avrasiya Birliyindən çıxacaqlar. Hətta parlamentə belə bir qanun layihəsini çıxaracaqlarını deyirlər. Amma əslində, bunlar hamısı şantaj, həyasızlıq, cəfəngiyyat və boş hədə-qorxudur. Bütün bunlar erməni siyasətinin bir alətidir və faktiki olaraq arxasında heç nə durmur".
Rusiyanın 200 il ermənilərə himayədarlıq etdiyini xatırladan politoloqun sözlərinə görə, Rusiya ermənilərə torpaq verib, onlar üçün dövlət qurub. Ermənistanda hərbi hissələr belə yaradıb. Hətta bu gün ermənilərin sərhədlərini də Rusiya qoruyur: “Ermənistandakı istehsal müəssisələrinin bir çoxu rusiyalı sahibkarlara məxsusdur. İşləyən zavodlara görə də Ermənistan Rusiyaya borcludur. Bir sözlə, indiyə kimi ruslar ermənilərin qulluğunda dayanıb. İndi Baş nazir Nikol Paşinyanın qərbyönümlü siyasət yürütməsinə görə münasibətlərin soyuması dərhal erməniləri ürküdüb. Nəticədə Ermənistanda avantürist xarakterli mitinqlər başlayıb:
“Əslində ermənilərin siyasi mövqe dəyişməsi təəccüblü deyil. Onlar bunu özlərinə ar bilmirlər. KTMT-dən gözlənilən cavabı almayan Ermənistanın mövqe dəyişməsi bu ölkənin əsl mahiyyətini ortaya qoyur. Ermənilər öz problemlərini başqalarının ayağına yazmağa adət ediblər. Ancaq Rusiya Ermənistanın asanlıqla onun təsirindən çıxıb, Qərbə doğru meyillənməsinə icazə verməyəcək. Çünki Rusiyanın orada bir sıra bazaları var. Rusiyanın Ermənistanda "5-ci kolonu" kifayət qədər güclüdür. Qarabağ erməniləri və revanşistlər tamamilə Rusiyanın əlindədir. Lazım gəlsə, Rusiya Ermənistandakı "5-ci kolon" vasitəsilə indi anti-Rusiya mitinqindəki insanlardan qat-qat çox insanı meydana çıxara bilər".
