Azərbaycan xarici işlər naziri Elmar Məmmədyarovla Ermənistan xarici işlər naziri Zöhrab Mnatsakanyan arasında növbəti görüş yanvarın 29-30-u tarixlərində İsveçrənin Cenevrə şəhərində keçiriləcək.
Nazirlərin ATƏT-in Minsk Qrupunun həmsədrləri ilə görüşəcəyi, bundan sonra Qarabağ münaqişəsi ilə bağlı ikitərəfli danışıqlar aparacağı gözlənilir.
Görüş barədə fikirlərini Sherg.az-la bölüşən "Atlas" Araşdırmalar Mərkəzinin sədri, politoloq Elxan Şahinoğlu bildirib ki, 2019-cu ildə Dağlıq Qarabağla bağlı danışıqlarda heç bir irəliləyiş əldə olunmadı.
Analitik qeyd edib ki, bu ilki danışıqların da nəticəsiz qalacağı güman edilir:
“Dövlət başçısı İlham Əliyev də vurğulamışdı ki, 2019-cu il danışıqlar baxımından itirilmiş il oldu. Bəli, həqiqətən də bu belədir. Çünki Paşinyanın mövqeyində heç bir dəyişiklik olmadı. O, həmçinin deyir ki, “Qarabağ Ermənistandır”. Düzdür, sonrakı açıqlamasında maraqlı fikir səsləndirdi ki, “keçmiş hakimiyyət Dağlıq Qarabağ ətrafındakı rayonları Azərbaycana təhvil vermək istəyib”. Paşinyan bununla sübut etmək istəyirdi ki, guya belə bir plan var. Lakin mövqedə heç bir dəyişiklik yoxdur.
Elxan Şahinoğlu: “Düşmən girovları azad etmir, o ki qaldı Dağlıq Qarabağ ətrafındakı rayonları boşaltsın”
2020-ci ildə danışıqlarda ciddi irəliləyişlərin olacağını düşünmürəm. Amma müəyyən görüşlər olacaq. Hətta fevral ayında Münhendə təhlükəsizlik konfransında Prezident İlham Əliyevlə baş nazir Nikol Paşinyan arasında qısa bir təmas ola bilər. Buna baxmayaraq Ermənistan hakimiyyətinin mövqeyində dəyişiklik yoxdursa, bu təmasların münaqişənin həllinə də ciddi təsiri olmayacaq. Elmar Məmmədyarov dekabr ayındakı sonuncu görüşdən çox narazı qalıb və bunu açıq ifadə etdi. Belə olan halda biz hansı irəliləyişdən danışa bilərik? Ermənistan hakimiyyətinin Dağlıq Qarabağ ətrafındakı rayonları boşaltmağı düşünməsinə dair hansısa işarə olmalıdır. Amma ermənilər buna açıq-aşkar hazır deyil. Hətta ən adi bir məqamı qeyd edim: xoş niyyət göstərmək istəsəydilər, ilk növbədə iki girovumuzu azad edə bilərdilər. Düşmən bu addımı atmağa razı deyil, o ki qaldı Dağlıq Qarabağ ətrafındakı rayonları boşaltsın. Ona görə də bu gedişlə danışıqlar yerində sayacaq. Azərbaycanın yeganə strategiyası hərbi qüdrətini gücləndirmək və orduya ayrılan vəsaiti artırmaqdır ki, Ermənistan da pullarını hərb sahəsinə xərcləsin nəticədə vəziyyətləri daha da ağırlaşsın”.
