Səbirsizlik edib svetoforun son saniyələrini gözləmirlər, yolun ortasında qalıb digər nəqliyyat vasitələrinin hərəkətinə mane olurlar.
Bu barədə DİN-in Nəqliyyatı İntellektual İdarəetmə Mərkəzinin (NİİM) yaydığı məlumatda bildirilib.
Qeyd olunub ki, paytaxtın əksər küçə və prospektlərində bəzi sürücülərin bir neçə saniyə irəli düşmək istəyi, əsasən də mərkəzi küçə və prospektlərdə sıxlığın yaranmasına səbəb olur: “Sürücülər svetoforun yaşıl işığının bitməsinə 1-2 saniyə qalmış hərəkət edərək kəsişmələrin ortasında, “sarı tor”un üzərində dayanıb sıxlıq yaradırlar. Xüsusilə də axşam saatlarında yollarda yaranan sıxlığı daha da artıran bu cür sürücülərin qaydalara əməl etməməsi diqqətdən kənarda qalmır. Müşahidə kameralarının görüntüləri əsasında Daxili İşlər Nazirliyinin Nəqliyyatı İntellektual İdarəetmə Mərkəzinin əməkdaşları tərəfindən hərəkətin intensivliyini artırmaq və sıxlığın qarşısını almaq üçün yol polisi ilə birgə mütəmadi tədbirlər görülür. Belə sürücülərə müraciət edərək bildiririk ki, yollarda sıxlığın yaranmaması bir çox hallarda hər birimizdən asılıdır. Müşahidələr göstərir ki, svetoforun son saniyələrini gözləməyib “irəli düşüm prinsipi ilə” kəsişməyə daxil olan sürücülər özləri də vaxt itkisi ilə qarşılaşırlar. Belə qayda pozan sürücülərin nəzərinə çatdırırıq ki, “Yol hərəkəti haqqında” Qanunun 75-ci maddəsinin 2-ci bəndinə əsasən, əgər yolayrıcında və ya hərəkət hissələrinin kəsişməsində tıxac yaranıbsa və bu, sürücünü dayanmağa məcbur edərək digər nəqliyyat vasitələrinin hərəkəti üçün maneə yaradacaqsa, sürücünün belə yolayrıcına və ya kəsişmə yerlərinə girməsi qadağandır. Bundan əlavə, İnzibati Xətalar Məcəlləsinin 327.2-ci maddəsinə əsasən, yolayrıcını keçmə qaydalarının pozulmasına görə səksən manat məbləğində cərimə və üç cərimə balı nəzərdə tutulub”.
Nəqliyyat məsələləri üzrə ekspert Rauf Ağamirzəyev “Sherg.az”a bildirib ki, bu təhlükədən daha çox kütləvi avtomobilləşmənin fəsadıdır:
“Avtomobilin işıqforda dayanmayıb daha tez keçərək sarı torda dayanması şəhərimizdə tıxaclı saatların artmasına səbəb olur. "Sarı tor"un mahiyyəti insanları çəkindirməkdən ibarətdir. Cərimənin məqsədi isə pul qazanmaq yox, insanları çəkindirməkdir. Kütləvi avtomobilləşmənin qarşısının alınması üçün demotivasiya olunmuş qərarlar verilməlidir. İctimai nəqliyyatın üstünlüyünü təşkil edən zolaqları və mikromobillik vasitələrinin hərəkəti üçün zolaqların təşkilini artıq müşahidə edirik. Hazırda piyada infrastrukturları bərbad haldadır və onlar düzəldilməlidir. İnsanlar qısa məsafədə bu hərəkət növlərindən istifadə edərək öz səfərlərini təşkil etməlidir. Bu qərarlar məhz insanları çəkindirməyə yönəldilib. Alternativlərin artması insanların pirioritetinə təsir edəcək. Hər hansı bir cərimənin tətbiq olunması, bu növ kəsişmələrdə tələsmədən hərəkət edilməsinə yönəlib. Həmin "sarı tor"un üstündə dayanıb digər istiqamətin hərəkətini iflic etmək, ümumi hərəkət durğunluğuna gətirib çıxarır”.
