Bu, Ermənistanın hərbi yüksəlişi yox, “ümidsiz xəstə”nin çırpınışlarıdır
Ermənistan nümayəndə heyəti Kiprdə rəsmi səfərdədir. Ermənistan ordusunun Baş Qərargah rəisi Edvard Asryan Kipr (Yunan) Milli Qvardiyasının Baş Qərargah rəisi Georgios Tsitsikostas ilə görüşüb. Tərəflər hərbi əməkdaşlığın gələcək inkişaf istiqamətlərini müzakirə ediblər. Xatırladaq ki, Ermənistan Yunanıstanla da sıx əlaqədədir. Hətta Yunanıstandan xeyli silah-sursat da alınır. Üstəlik, ötənlərdə Ermənistan müdafiə naziri Almaniyaya səfər etmiş, tərəflər arasında hərbi əməkdaşlıq müzakirə olunmuşdu. Bütün bunlar göstərir ki, Ermənistan hərbi cəhətdən güclənmək yolunu tutub.
Politoloq Azər Qasımov "Şərq"ə açıqlamasında deyib ki, Ermənistanın silahlanma cəhdləri "ümidsiz xəstənin çırpınışları"na bənzəyir. Ekspertin sözlərinə görə, Ermənistan heç bir xeyri olmayacağını bilə-bilə Azərbaycanı qıcıqlandırmaqla məşğuldur:
"Ermənistan bu cür addımlarla Azərbaycana meydan oxumağa cəhd edir. Dəfələrlə Azərbaycan Prezidentinin Ermənistana xəbərdarlıqlarına baxmayaraq, yenidən silahlanmaya cəhd edilməsi İrəvan üçün yaxşı bitməyəcək. Yunan, hindli, fransız gəlib ermənilərin yerinə Azərbaycan Ordusunun qarşısında durmayacaq. Fərariliyin at oynatdığı erməni ordusu yenə Azərbaycan əsgərinin qarşısında məhv olacaq. Bəzi ölkələrdən əldə etdiyi silahlar da yenidən Azərbaycan Ordusuna qalacaq. Əlbəttə, bizə qalan sadəcə silahlar olmayacaq. Həmin silahların yerləşdiyi ərazilər də Azərbaycana təhlükə yaratdığı üçün ordumuzun nəzarətinə keçəcək. Hesab edirəm ki, Ermənistan rəhbərliyi təhlükəsizliyini qorumaq üçün hərbi sahədəki aktivliyini sıfıra endirməlidir. Yaxşı olar ki, İrəvan Azərbaycanın müharibədən sonrakı xoş niyyətindən sui-istifadə etməsin. Azərbaycan Ordusuna tuşlanan hər silah Ermənistanın dövlətçiliyinə tuşlanıb. Ermənistanın təhlükəsizliyini qorumaq arzusuna düşənlər əllərindəki yarımçıq dövlətdən də olacaqlar".
