Qafqaz Müsəlmanları İdarəsinin Qazılar Şurasının İrəvan qazısı vəzifəsinə Bəxtiyar Nəcəfovun namizədliyi irəli sürülüb.
Bunu Qafqaz Müsəlmanları İdarəsinin sədri şeyxülislam Allahşükür Paşazadə QMİ-nin Qazılar Şurasının iclasında deyib.
Sonra Bəxtiyar Nəcəfovun İrəvan qazısı təyin olunması səsə qoyularaq qəbul edilib. Daha sonra İrəvan Qazısının Əsasnaməsi təsdiqlənib. Qafqaz Müsəlmanları İdarəsinin sədr müavini Fuad Nurullayev QMİ-nin Qazılar Şurasının iclasında Əsasnməni səsləndirib.
Qeyd edilib ki, İrəvan qazılığı hələ ki, QMİ-nin binasında yerləşəcək.
Allahşükür Paşazadə bildirib ki, İrəvan qazısı olaraq, Azərbaycanın ən mötəbər adamları təyin edilib:
"İrəvan quberniyasında 300-dən artıq məscid, onlarla mədrəsə olub. İrəvan qazısı olaraq, Azərbaycanın ən mötəbər adamları təyin edilib. Ermənistanın Azərbaycan torpaqlarını işğal etdiyi dövrdə islam sivilizasiyası yerlə bir edilib. Bu işğal QMİ-nin İrəvan qazılığına da təsirsiz ötüşməyib. Prezident İlham Əliyevin rəhbərliyi ilə Ordumuz torpaqlarımızı işğaldan azad edib, o ərazilər indi bərpa edilir, yenidənqurma işləri aparılır. Bütün bunlar İrəvan Qazılığının da işinin yenidən qurulmasını labüd etdi”.
Məsələni dəyərləndirən ilahiyyatçı Tural İrfan “Sherg.az”a açıqlamasında deyib ki, tarixən bizim Qərbi Azərbaycanın regionları, bölgələri üzrə qazılar, din alimləri fəaliyyət göstərib:
“O cümlədən İrəvan qazılığı da olub. Hazırda bu məsələnin gündəmə gətirilməsi və İrəvan qazısının fəaliyyətinin bərpa olunması çox önəmli məsələdir. Bu, bizim çoxdankı arzumuz və istəyimiz idi. Qərbi Azərbaycan İcması var və əhəmiyyətini özündə saxlayır. Təbii ki, əhalinin dini inancına uyğun olaraq qazının da fəaliyyəti təbii ehtiyacdan yaranan məsələlərdəndir. Məlumdur ki, Ermənistanla sülh danışıqları artıq effekt verir və ehtimal ki, yaxın zamanda öz müsbət nəticələrini ortaya qoyacaq. Qərbi Azərbaycan əhalisinin öz yurdlarında yenidən qayıtması, tarixi, siyasi, hüquqi zərurətdir. Belə olduğu halda dini icmaların mövcudluğu, din xadimlərinin fəaliyyəti də digər məsələlər kimi labüdləşir. İrəvanda bizim məscidlərimiz, mədrəsə və dini ocaqlarımız fəaliyyət göstərib. Hazırda regionda Azərbaycan tarixi ədaləti bərpa etmək əzmindədir. Bu fürsətdən istifadə edərək Qafqaz Müsəlmanları İdarəsinin İrəvan üzrə qazılığı bərpa etməsini müsbət qarşılamalıyıq. Yerindən, yurdundan edilmiş Qərbi Azərbaycan əhalisi müsəlmandır və dini inanca uyğun olaraq qazının fəaliyyəti də mütləq şəkildə vacibdir. Dövlətin apardığı səmərəli siyasət nəticəsində inşallah əhalimiz öz yerlərinə qayıtdıqda şübhəsiz ki, qazılar da İrəvanda, Göyçədə, Dərələyəzdə, Vedidə və digər tarixi mahallarımızda fəaliyyətlərini davam etdirəcəklər. Əvvəllər də bu belə olub. Hər bir halda bu, xalqımızın inancı, dini etiqadının danılmaz haqqı kimi vacibdir”.
Ekspert vurğulayıb ki, Qafqaz Müsəlmanları İdarəsinin bütün addımları təbii ki, dövlət maraqlarına zidd olmamalıdır:
“Bu qazılığın bərpası zamanı kənar təsirlər, xarici maraqlar rol oynamamalıdır. Qafqaz Müsəlmanları İdarəsi kənar təsirlərə uymamalı, bəzən yol verdiyi strateji səhvlərə bir də yol verməməlidir. Bu qazılığın fəaliyyəti Azərbaycan dövlətinin daxili və xarici siyasətinin prinsiplərinə xələl gətirməməli, əksinə dəstək verməlidir. Təqlidçilik adı altında xarici maraqların bu məsələdə özünə boşluq tapmasına fürsət yaratmamalıdır. Çünki bu qazılıq indidən hansı istiqamətdə yeni fəaliyyət təməllərini atacaqsa sonra da o cür davam edəcək. Odur ki, indidən dövlət siyasətinə uyğun, xalqımızın, dövlətimizin maraqlarına uyğun şəkildə fəaliyyətini qurmalıdır”.
