“ABŞ Ukrayna Prezidenti Volodimir Zelenskini hakimiyyətdən uzaqlaşdırmaq üçün ciddi işə başlayıb”.
Bunu Ukraynanın keçmiş baş naziri Nikolay Azarov (2010-2014) deyib.
“Bu, aqoniyadır. Tamamilə bəllidir ki, amerikalılar onu hesabdan çıxarıblar və indi onu aradan götürməyə çalışırlar”, - sabiq baş nazir bildirib.
Xatırladaq ki, 2014-cü ildə barəsində korrupsiya və çirkli pulların yuyulması ittihamları ilə cinayət işi açılan Nikolay Azarov beynəlxalq axtarışa verilib və barəsində məhkəmənin hökmü ilə qiyabi həbs cəzası çıxarılıb. Hazırda Rusiyada yaşayan Ukraynanın sabiq baş naziri müharibədə Moskvanın mövqeyini müdafiə etdiyinə görə ölkəsində vətən xaini olaraq qəbul edilir.
Siyasi şərhçi Azər Həsrət Sherg.az-a deyib ki, Tramp administrasiyası hakimiyyətə gəldikdən sonra Ukrayna məsələsində nala-mıxa vurmaqla məşğuldur:
"Bütün dünya ABŞ-dən ədalətli yanaşma gözləyirdi. Hətta ümid edilirdi ki, Tramp Rusiyaya qarşı təzyiqlərini artıracaq və bununla da müharibə bitəcək. Lakin Ağ Evin sahibi elə ilk gündən Moskvanın daha da həvəsləndirilməsi ilə məşğuldur. Faktiki olaraq, ABŞ müharibəni bitirə biləcəyi yerdə əksinə, alovlandırdı. Zelenski ilə bağlı söylənənlər də elə buradan qaynaqlanır. Əslində Vaşinqton "dovşana qaç, tazıya tut" deyir. Nəticə etibarilə Tramp müharibənin daha da uzanmasında maraqlıdır. Bütün bunlar Rusiyanın tamamilə ləğv edilməsi ilə yerində müstəqil dövlətlərin qurulmasına hesablanıb".
