"Məktub beynəlxalq təşkilatın blankında yazılıb"
"Əsgərlərimiz Azərbaycana sağ-salamat qayıdacaqlar"
Ermənistanda əsir saxlanılan Azərbaycan Ordusunun əsgəri Aqşin Bəbirov anası Dürdanə Bəbirovaya məktub göndərib. Dürdanə Bəbirova "Modern.az"a açıqlamasında bildirib ki, oğlunun əsirlikdə yazdığı məktubu Beynəlxalq Qırmızı Xaç Komitəsinin nümayəndələri onlara çatdırıblar. Lakin Dürdanə Bəbirova məktubun oğlu tərəfindən yazıldığına şübhə ilə yanaşdığını söyləyib. Onun sözlərinə görə, məktub oğlunun xətti ilə yazılmayıb. Anası deyib ki, o, övladının xəttini tanıyır: "Bizə verilən məktubu o yazmayıb. Oğlumu 100 faiz sorğu-sual ediblər, oğlum deyib, ermənilər də yazıb.
Öz xəttinə qətiyyən oxşamır”. Sözügedən məktubda bunlar yazılıb: "Salam, anam, atam. Mən yaxşıyam. Burada heç bir problem yoxdur, narahat olmayın". Qeyd edək ki, bu yaxınlarda BQXK nümayəndələri Ermənistanda əsir götürülən Azərbaycan Ordusunun əsgərlərinə baş çəkiblər. İrəvanda keçirilən görüş zamanı hərbçilərə ailələri ilə Qızıl Xaç Məktubu vasitəsilə əlaqə yaratmaq imkanı verilib.
Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə "Sherg.az"a açıqlamasında deyib ki, iki əsgərimiz qeyri-qanuni və saxta ittihamlarla Ermənistanda həbs edilib.
Hüquq müdafiəçis bildirib ki, bütün vasitələrdən istifadə etməklə məhkəməni və istintaqı gözləmədən əsgərlərimizin azad olunması üçün əlimizdən gələni etməliyik:
"İstintaq və məhkəməni gözləsək, bu proses uzanacaq. Təbii ki, gec-tez iki əsgərimizi ermənilərdən alacağıq. Düzdür, erməni tərəfi bunu alver predmetinə çevirə bilər, amma əsas odur ki, əsgərlərimizin Azərbaycana sağ-salamat qayıtması reallaşacaq.
Məktubla bağlı isə onu deyim ki, inanmıram ki, beynəlxalq təşkilat olan Qırmızı Xaç Komitəsi bu boyda saxtakarlığa getsin və başqa adamın yazdığı məktubu əsgərin anasına çatdırsın. Dürdanə xanım anadır, təbii ki, övladının taleyinə görə narahatdır. Xüsusən, əsirlərimizə qarşı işgəncələri əks etdirən video-görüntülərin yayılmasından sonra valideynlərin narahatlığını başa düşürük.
Ancaq bir tərəfdən BQXK əsgərlərimizlə bağlı məsələni nəzarətə götürübsə, onların taleyi və sağlamlığı şübhə altında ola bilməz. Onların üzərində beynəlxalq bir qurumun nəzarəti var. Məktub da beynəlxalq təşkilatın blankında yazıldığı üçün saxta olduğunu, kimlərinsə diktəsi ilə yazıldığına inanmıram. Sadəcə indiki durumda hər iki əsgərimizin ailəsinə dözümlü və mətin olmağı arzulayıram.
Azərbaycan dövləti və onun Prezidenti heç bir vətəndaşın taleyinə biganə qalmayacaq. Ona görə əminliklə qeyd edirəm ki, əsgərlərimiz Azərbaycana sağ-salamat qayıdacaqlar. Bu, mütləq baş verəcək".
