"Karantin rejiminin zəifləməsi yoluxanların sayının artması fonunda baş verir. Yəni tərs mütənasiblik var. Məntiq yoxdur. Amma səbəb var: əhalinin əksəriyyəti təhlükənin reallığını ciddi qəbul etmir və rejimə riayət etmir".
Bunları tanınmış iqtisadçı, bank məsələləri üzrə ekspert Əkrəm Həsənov özünün "Facebook" hesabında yazıb.
O, televiziya kanallarını da günahlandırır: "Bunun iki səbəbi var. Karantinin ilk günlərindən bildirmişəm ki, telekanallar siyasətlərini dəyişməli idi. Yeni verilişlərin çəkilişi (xüsusilə qonaqların dəvət edilməsi ilə) minimuma endirilməli idi. Üstünlük filmlərə və teletamaşalara verilməli idi. Amma belə olmadı. Əhali gördü ki, ən çox inandığı yerdə-Tv- də əvvəlki kimi çal-çağır və dambadurumdur. Çoxları üçün elita televiziyaya çıxanlardır. Əhali düşündü ki, onlar canı üçün qorxmursa, deməli, təhlükə yoxdur...".
BDU- nun Jurnalistika fakültəsinin professoru Cahangir Məmmədli isə "Sherg.az"a bildirib ki, narahatlığa əsas yoxdur:
"Mən televiziya kanallarını diqqətlə izləyir və onların fəaliyyətini bəyənirəm. Düzdür, şou- biznes proqramları müəyyən qədər karantin qaydalarını pozur, amma ümumi mənada onların fəaliyyəti təqdirəlayiqdir. AzTV efirində yayımlanan və mənim maraqla izlədiyim "Çıxışa doğru", İctimai TV-nin efirində "Sabaha saxlamayaq" kimi verilişlərdə qonaqlar, aparıcı sosial məsafəni qoruyur, hərəsi divanın bir küncündə oturur və əllərinə əlcək taxırlar. Həmçinin "Real" TV-nin müxbirləri də reportajlar hazırlayarkən respondentlə aralarında məsafə saxlayır, qoruyucu vasitələrdən istifadə edirlər. Onlar bu hərəkətləri ilə, əksinə, tamaşaçılara nümunə olurlar. Odur ki, şəxsən mən AzTV başda olmaqla kanallarımızın fəaliyyətindən razıyam".
Professor bir çatışmazlığı da vurğulayıb:
"Deməliyəm ki, bəzən kanallarımız pandemiyanı infodemiyaya çevirirlər. Bu isə əhali arasında panikanın yaranması ilə nəticələnir. Dezinformasiya virusdan daha qorxuludur. Odur ki, bəzi kanallar yayım siyasətlərinə daha diqqətlə yanaşmalıdırlar".
