Bələdiyyə sədrlərinin istefasının arxasında bir neçə səbəb var
Türkiyənin siyasi gündəmi hakim partiyanı təmsil edən bələdiyyə sədrlərinin istefası ilə çalxalanır. İstanbul Bələdiyyəsinin sədri Kadir Topbaşın vəzifədən getməsindən sonra Ankara bələdiyyə sədri Məlih Gökçək də 28 oktyabrda istefa verəcəyini bildirib. O, həmin gün bələdiyyədə iclas keçiriləcəyini və hər kəslə vidalaşdıqdan sonra vəzifəsindən ayrılacağını açıqlayıb.
Bursanın bələdiyyə sədri Rəcəb Altəpə də istefa verdiyini söyləyib. Xatırladaq ki, bir neçə gün öncə Ərdoğan İstanbul, Ankara, Bursa və Balıkesir və digər bələdiyyə sədrlərini istefaya çağırmışdı. Prezident bildirib ki, əgər sədrlər istefa verməsələr, bunun cəzası ağır olacaq: "O zaman nə lazımdırsa, tətbiq olunacaq. Çünki aidiyyəti qurumlarımız bununla bağlı qərarlarını veriblər. Biz sıradan partiya deyilik. Bu da sıradan olan hərəkət deyil”.
Türkiyədəki proseslərlə bağlı "Şərq”ə danışan politoloq Natiq Miri deyib ki, bələdiyyə sədrlərinin istefasının arxasında bir neçə səbəb var. Ekspert bildirib ki, ən başlıca səbəb 2019-cü ildə Türkiyədə keçirilən prezident və parlament seçkiləridir:
"Bu yöndə atılan addımları bir növ seçkiyə hazırlıq prosesi kimi dəyərləndirmək lazımdır. Nəzərə alaq ki, Türkiyədə prezident səlahiyyəti ilə bağlı keçirilən referendumda ölkənin mərkəzi şəhərləri sayılan Ankara, İstanbul, Bursa və digər böyük məntəqələrdə hakim AKP qalib gələ bilmədi. Halbuki onu müxalif MHP də dəstəkləyirdi. Bələdiyyə sədrlərinin AKP üzvü olmasına rəğmən, iri şəhərlərdə seçkinin nəticələrinin hakim partiyanın xeyrinə olmaması ciddi siyasi göstərici idi. Dəyişikliklərin əsas amillərindən biri məhz bu məsələdir.
Əslində həmin şəhərlərin bələdiyyə sədrlərinin istefası uzun müddətdir gündəmdə idi. Xeyli zamandır bu şəhərlərdə bələdiyyə sədri vəzifəsini icra edən şəxslərin müəyyən qüsurları haqqında informasiyalar dolaşırdı. Bu da onları xalqın gözündən salırdı. Ərdoğan həmin şəxsləri dəyişməklə bütövlükdə prosesə yeni nəfəs gətirmək, ictimai fikri müsbət yönə çevirmək istəyir”.
N.Miri bəyan edib ki, 2019-cu il AKP və Ərdoğan üçün həlledici dövr olacaq: "Seçkilərin əvvəlki illərdə olduğu kimi çox asanlıqla qazanılacağı düşüncəsi zəifdir. Çünki AKP-ni hədəfə alan xeyli daxili və xarici güclər mövcuddur. Səudiyyə Ərəbistan daxil olmaqla ərəb dünyasının böyük əksəriyyəti Ərdoğanın iqtidardan getməsinin marağındadır. Bu baxımdan növbəti seçkilərə böyük maliyyələr sərf olunacaq. Hətta ölkədə yeni siyasi gücün yaranacağı da iddia edilir. Yaxın günlərdə Meral Akşenerin yeni partiya yaradacağı bildirilir. Məlumdur ki, Akşener MHP və digər müxalif partiyalar tərəfindən ciddi şəkildə dəstəklənir. Xaricdən dəstəklənən yeni siyasi gücün qarşısında duruş gətirmək üçün AKP hökumətinin yenilənməsinə, kadr dəyişikliyinə ehtiyac var”.
İsmayıl
