Fazil Mustafa spikerlə zarafatlaşdı

Oqtay Əsədov: “Birdən-ikiyə sizinlə zarafatım var ki, deyirsiniz zarafat edirəm?”

Parlamentin dünən baş tutan iclasında Böyük Quruluş Partiyasının sədri, millət vəkili Fazil Mustafa ilə Milli Məclisin sədri Oqtay Əsədov arasında mübahisə yaranıb. F.Mustafa çıxışa başlayanda deyib ki, o, çıxışa yazılan kimi başqa deputatlar da çıxışa yazılırlar. O.Əsədov isə bu ifadələrə görə deputata irad tutub: "Fazil bəy, siz özünüz haqqında yüksək fikirləşirsiniz. Bununla da digər həmkarlarınızı aşağılayırsınız. Belə olmaz, çıxışlarınıza fikir verin”. F.Mustafa isə spikerə etiraz edərək deyib ki, o nə özü haqda yüksək, nə də həmkarları barəsində aşağı fikirdədir: "Sadəcə, mən bunu zarafat kimi dedim. Hesab edirəm ki, sizin buna kobud cavab verməyiniz doğru deyil”. Spiker isə yenidən deputatın cavabını verib: "Fazil müəllim, siz burada danışdınız. Əvvəla, mənim sizinlə zarafatım yoxdur ki, burada mənimlə zarafat edəsiniz. Siz dediniz, mən də cavab verdim. Siz öyrənmisiniz ki, hər sözün davamında bir replika atasınız. Birdən-ikiyə sizinlə zarafatım var ki, deyirsiniz zarafat edirəm?”.