Azərbaycan Respublikası Maliyyə Bazarlarına Nəzarət Palatasının (Palata) Direktorlar Şurasının 21 iyul 2016-cı il tarixli qərarına əsasən "Dekabank” ASC, "Kredobank” ASC, "Parabank” ASC və "Zaminbank” ASC-nin bank lisenziyaları ləğv edilib.
Məlumata görə, palata bu qərarını həmin bankların aktivlərini qanunvericiliklə tələb olunan qaydada təsnifləşdirmədiklərinə, mümkün zərərlər üzrə adekvat ehtiyatlar yaratmadıqlarına, məcmu kapitalın minimum məbləği tələbinə əməl etmədiklərinə, təhrif edilmiş hesabatları təqdim etdiklərinə, bütövlükdə cari fəaliyyətlərini etibarlı və prudensial qaydada idarə etmədiklərinə, eləcə də nəzarət orqanının verdiyi yazılı göstərişləri yerinə yetirmədiklərinə görə qəbul edib. Qərar problemli və adekvat kapitallaşmamış bankların sistemdən kənarlaşdırılması vasitəsilə bank sektorunda rısklərin azaldılması, maliyyə dayanıqlığının gücləndirilməsi, etimadın artırılması və bütövlükdə maliyyə sektorunun inkişafına istiqamətlənib. Bankların bağlanma səbəbini şərh edən iqtisadçı-ekspert Nazim Bəydəmirli qeyd edib ki, ölkədə bankların çox olması rəqabət mühitinin yaranması baxımından çox yaxşı hal idi: "Əhali üçün bankların sayının çox olması seçim imkanını artırır. Banklar biri-biri ilə rəqabətə girdikdə, daha ucuz resurs verə bilir, yaxud da daha yaxşı xidmət göstərməyə çalışır. Ancaq Azərbaycan kimi iqtisadiyyatı monopoliyada olan ölkələrdə bankların çox və az olmağının elə də əhəmiyyəti yoxdur. Adətən banklar eyni holdinqlərə məxsus olduğundan onların pul kredit siyasəti, resurs cəlbi və depozitlərə verdiyi faizlər də aşağı-yuxarı üst-üstə düşür. Çox da fərqlənmirlər”.
Ekspert diqqətə çatdırıb ki, hazırda insanları narahat edən həmin banklara qoyulan vəsaitlərin geri qaytarılmasıdır: "Əmanətlərin sığortalanması haqqında qurum var. Onlar mütəmadi olaraq məlumat verirlər ki, guya banklarda vəsaitlərin 95 faizi sığortalanıb. Amma sonradan verilən kompensasiyalar onu göstərir ki, bu heç də deyilən kimi deyilmiş. Ümid edək ki, əhalinin pulu geri qaytarılacaq. Amma mən bununla bağlı çox da optimist düşünə bilmirəm”.
Ayyət Əhməd
