"Suriyanın rəsmi dövlət qüvvələri ilə türk ordusu arasında qarşıdurma qaçılmazdır”.
Bunu "Sherg.az”a PKK terror təşkilatının Suriya qolu olan PYD/YPG və Suriya prezidenti Bəşər Əsəd arasında Afrinlə bağlı razılaşma əldə edilməsindən danışarkən siyasi İnnovasiya və Texnologiya Mərkəzinin (SİTM) sədri, politoloq Mübariz Əhmədoğlu söyləyib.
O bəyan edib ki, bu məsələdə hansı tərəfin haqlı olduğunu demək çətindir:
"Türkiyə kürd məsələsində əvvəldən yanlışlara yol verdi. Digər dövlətlərə bu məsələ ilə məşğul olmağa imkan verməməli idi. Kürd məsələsi ilə ABŞ və Türkiyə məşğul idi. Sonradan Rusiya və İranın prosesə qoşulması vəziyyəti qəlizləşdirdi.
Kürd məsələsi Türkiyənin monopoliyasına aiddir. O biri dövlətlər çalışacaqlar ki, kürdlərlə Türkiyə ordusunun mübarizəsi uzun müddət davam etsin. Həmin hərbi əməliyyatları Türkiyənin qanayan yarasına çevirmək istəyirlər.
Bunun arxasında Türkiyəni daim zəiflətmək məqsədi dayanır. Ona görə, Türkiyənin Suriyadakı hərbi əməliyyatı xeyli davam edəcək. İri dövlətlər də bundan istifadə edərək, Türkiyəni zəiflətməyə çalışacaq".
Qeyd edək ki, Türkiyənin baş naziri Mövlud Çavuşoğlu qeyd edib ki, Türkiyə Suriyanın ərazi bütövlüyünü dəstəkləyir. Amma Əsəd rejimi PYD/YPG-ni təmizləmək üçün Afrinə daxil olmaq istəyirsə, problem yoxdur. Ancaq Suriya rejimi PYD/YPG-ni qorumaq üçün Afrinə gedirsə, heç kim Türkiyəni dayandıra bilməz.
Aysel Aslan
