Türkiyədə əsas müxalifət partiyalardan hesab olunan Milliyətçi Hərəkat Partiyasının növbəti qurultayının tarixi bəlli olub. MHP sədri Dövlət Baxçalı müzakirələrə son nöqtəni qoyub və 10 iyulda qurultayın keçiriləcəyini bəyan edib: "Qurultay xalqın gözü qarşısında keçiriləcək. Kim istəyirsə, partiya rəhbərliyinə namizədliyini verə bilər. Amma bilsin ki, o, şəxsən mənimlə yarışacaq. Bütün iddialara növbə ilə baxılacaq”.
Xatırladaq ki, tanınmış millətçilərdən Meral Akşener, Sinan Oğan, Koray Aydın başqanlığa iddia edənlər arasındadır. Onlar açıq şəkildə Dövlət Baxçalıya qarşı mübarizə aparırlar. Ekspertlər növbəti qurultayın gərgin keçəcəyini, millətçilərin parçalana biləcəyini iddia edirlər.
Millətçilər arasındakı qarşıdurmaya münasibət bildirən politoloq Qabil Hüseynli "Şərq”ə verdiyi açıqlamada MHP-ni parçalamaq istəyən qüvvələrin olduğunu deyib. Ekspertin fikrincə, həmin qüvvələr hakimiyyət tərəfindən stimullaşdırılır: "MHP Türkiyənin əsas millətçi partiyasıdır və kürd separatizminə qarşı ən sərt şəkildə mübarizə aparır. Amma təəssüflər olsun ki, partiyada təxribatçı siyasi qüvvələrə alət olan millətçilər var. Sədrliyə iddialı olan Meral Akşener heç vaxt millətçi ola bilməz. Çünki o xanım millətçilik məktəbini keçməyib. Məncə, Akşener xarici qüvvələrin təsiriylə Dövlət Baxçalıya baş qaldırıb. Sinan Oğan isə azərbaycanlıdır, şəxsən tanıdığım və çox hörmət etdiyim bir adamdır. Amma o, deputat seçilmədikdən sonra rəhbərliyə bayraq açdı. İndi Sinan Oğanı partiyadaxili separatizmin əsas nümunəsi kimi qəbul edirəm. Digər namizədlərdən Koray Aydın isə vaxtı ilə koalisiya hökumətində yol tikintisi naziri olub. Lakin maxinasiyalarda, ciddi pul mənimsəmələrində adı hallandığı üçün vəzifəsindən azad edilib”. Q.Hüseynli bildirib ki, partiyaya rəhbərlik iddiasında olan şəxslər Dövlət Baxçalı kimi dürüst adam olmalıdır: "Düzdür, Baxçalının nöqsanları var, amma o ömründə bir stəkan haram su içməyib. Digər siyasətçilər kimi "qarın davası” aparmayıb, hər zaman ideya adamı olub. Çox təəssüflər olsun ki, indi siyasi partiyaların bir çox iri maliyyə kapitalları tərəfindən idarə olunur. Bundan istifadə edən bəzi qüvvələr MHP-nin imicinə zərbə vurmaq, partiyanı parçalamaq istəyirlər. Amma bu baş tutmayacaq. Çünki partiyanın əsas yaradıcıları və əksəriyyət Dövlət Baxçalının ətrafında cəmlənib”.
İsmayıl
