İşçi qrupunun yaradılmasında məqsəd ilk növbədə vətəndaşların təhlükəsizliyinin təmin olunmasıdır
Goranboy rayonunun Boluslu və Eyvazlılar kəndlərinə canavarların hücum edərək kənd təsərrüfatı heyvanlarına zərər vurması ilə bağlı Ekologiya və Təbii Sərvətlər Nazirliyinə daxil olan məlumat əsasında işçi qrup yaradılıb.
Nazirlikdən verilən məlumata görə, ETSN-in və "Azərovçu” İctimai Birliyinin əməkdaşlarından ibarət işçi qrup vətəndaşların təhlükəsizliyinin təmin olunması və onların əmlakına zərər vurulmasının qarşısının alınması məqsədi ilə sözügedən ərazini nəzarətə götürərək vəhşi heyvanların sayının tənzimlənməsi ilə bağlı tədbirlər görür.
Nazirliyin mətbuat xidmətinin rəhbəri İradə İbrahimova yeni işçi qrupunun hansı formada fəaliyyət göstərəcəyi ilə bağlı "Şərq”ə danışıb. Onun sözlərinə görə, işçi qrupunun yaradılmasında məqsəd ilk növbədə vətəndaşların təhlükəsizliyinin təmin olunmasıdır:
"Təhlükəli məqamlar zamanı yaradılan qruplar əvvəlcə hürküdücü vasitələrdən istifadə etməklə vəhşi heyvanları uzaqlaşdırmağa çalışacaqlar. Əsas tədbirlərdən biri budur. Hansısa heyvan insan həyatı üçün təhlükə yaradırsa, onun üzərinə hücum edirsə, həmin heyvan özünü müdafiə kimi vurula bilər. Belə halda heyvanı vuran şəxsə qanun pozuntusu şamil edilmir. Məlumdur ki, qoşulduğumuz konvensiyaya görə canavarları vurmaq qadağandır.
Amma insanlar özləri hansısa vəhşi heyvanı təqib edib öldürürsə, cərimə tətbiq edilə bilər. Lakin vəhşi heyvan sakinlərə hücum edirsə, ilk növbədə vətəndaşlar nazirliyə müraciət edirlər. Nazirlik tərəfindən yaradılan işçi qrup müəyyən ərazilərdə reydlərə başlayır və reydlər zamanı tez-tez təhlükəli halların təkrar olunduğunu görürlərsə, heyvanlara hürküdücü vasitələr tətbiq edib ərazidən uzaqlaşdırmağa çalışırlar”.
Yeganə Bayramova
