Çingiz Qənizadə: “Ən azı 3500 məhkum cəzaçəkmə müəssisəsindən azad ediləcək”
Milli Məclisin dünənki iclasında Heydər Əliyev Fondunun prezidenti, millət vəkili Mehriban Əliyeva amnistiya təklifi ilə çıxış edib. M.Əliyeva 28 May Respublika günü münasibəti ilə belə bir amnistiyanın tətbiqinə ehtiyac olduğunu bildirib. Millət vəkilinin bu təklifinin parlamentin qarşıdakı iclasında müzakirə ediləcəyi gözlənilir.
Mehriban Əliyevanın amnistiya təklifini təqdirəlayiq hesab edən Qadın Hüquqlarını Müdafiə Cəmiyyətinin sədri, hüquq müdafiəçisi Novella Cəfəroğlu təklifi alqışlamaqla yanaşı, indiki məqamda belə bir amnistiyaya ciddi ehtiyac olduğunu vurğulayıb: "Bu təklifi alqışlayıram və hesab edirəm ki, indiki məqamda buna çox böyük ehtiyac var. Çünki həbsxanalar məhbuslarla doludur. Cəzasının qurtarmasına 3-4 ay qalan məhbusların azad edilməsi məqsədəuyğun olar. Budəfəki amnistiyada isə cəzasının qurtarmasına bir il qalan məhbusların da azad edilməsi gözlənilir. Hesab edirəm ki, hər zaman olduğu kimi bu dəfə də amnistiya təşəbbüsü humanist bir addım kimi təqdir edilməlidir”.
Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə də birinci xanımın təşəbbüsünü yüksək qiymətləndirdiyini deyib: "Çoxdan gözlənilən addım idi ki, bunu da Mehriban xanım atdı. Buna görə də çox sağ olsun”. Millət vəkilinin dediyinə görə, amnistiyanın 10 min məhkumu əhatə etməsi gözlənilir: "Ən azı 3500 məhkum cəzaçəkmə müəssisəsindən azad ediləcək. Digərləri də müəyyən cəzalar almış olacaq. Ümumilikdə 10 min məhkum çox böyük rəqəmdir. Hesab edirəm ki, bu, yüz minlərlə insanın sevinci deməkdir. Çünki hər bir məhkumun arxasında yüzlərlə qohumu, qardaşı, dostu-tanışı var. Hesab edirəm ki, bu humanist addım alqışlanmalıdır”.
Konkret olaraq kimlərin azadlığa çıxacağı məsələsinə gəldikdə isə millət vəkili deyib ki, amnistiya qanundur: "Bu qanunun tələblərinə kimlər düşəcəksə, onlar da azad olunacaq. Hesab edirəm ki, 10 min məhkumun içərisində kimisə axtarmaq əbəsdir. Onlar Azərbaycan vətəndaşları olacaq, bir hissəsi də xarici ölkənin vətəndaşları”.
Şəymən
