"Azərbaycan və İran arasında hərbi-sənaye, müdafiə sahəsinə dair razılaşmalar var”.
Bunu "Sherg.az”a İranın müdafiə nazirinin ölkəmizə səfəri haqqında danışarkən Orta Doğu Araşdırmalar Mərkəzinin rəhbəri, politoloq Sədrəddin Soltan bildirib.
O vurğulayıb ki, bu səfər imzalanmış anlaşmaların davamıdır:
"Çünki Azərbaycanla İranın hərbi sahədə əməkdaşlığı yalnız hərbi-texniki avadanlıqların mübadiləsi, ticarəti ilə bağlıdır. Ola bilər, Azərbaycan hərbçilərinin İranda, iranlı hərbçilərin ölkəmizdə təmin keçməsi ilə bağlı razılıq əldə edilsin. Ümumiyyətlə isə, bu, adi səfərdir”.
Azərbaycanın qərbə inteqrasiya məsələsinə üstünlük verdiyini xatırladan S.Soltan diqqətə çatdırıb ki, İran NATO-ya, qərbə qarşı olan ölkədir:
"Azərbaycan NATO-nun bir sıra proqramlarında iştirak edir. Ola bilər ki, İranla da bəzi razılaşmalar olsun. Bu məsələlərdə cənub qonşumuz Azərbaycanı dəstəkləsin. Amma heç bir halda Azərbaycan və İran arasında eyni mövqedən çıxış etmə prinsipi yoxdur. Azərbaycanın 20 faiz torpaqları işğal altındadır və İran bu istiqamətdə ölkəmizə köməklik göstərmir.
ABŞ-ın Rusiyaya sanksiya tətbiq etmək planları Azərbaycanın bu dövlətdən silah almasına imkan verməyə bilər. Nəzərə alsaq ki, İrana da sanksiya tətbiq edilməsi gündəmdədir. Deməli, cənub qonşumuzdan silah alınmasında da problem yarana bilər. Ona görə, Azərbaycan və İran arasında hərbi sənaye kompleksi ilə bağlı təcrübə mübadiləsi, sülhməramlı tədbirlərdə iştirak məsələləri daha aktualdır”.
Qeyd edək ki, İran İslam Respublikasının müdafiə və silahlı qüvvələrə dəstək naziri, general-mayor Əmir Hatəminin rəhbərlik etdiyi nümayəndə heyəti fevralın 21-də Azərbaycana səfər edəcək.
Müdafiə Nazirliyinin mətbuat xidmətinin məlumatında deyilir ki, səfər çərçivəsində İran nümayəndə heyətinin Azərbaycanın Müdafiə Nazirliyi və digər dövlət strukturlarında görüşləri nəzərdə tutulub. Səfər fevralın 22-dək davam edəcək.
Aysel Aslan
