"Heyvanlara və bitkilərə aid dərmanlar bərbad vəziyyətdədir”.
Bunu Sherg.az-a son günlər bölgələrdə heyvanların dərmanların keyfiyyətsizliyi səbəbindən məhv olmasına münasibət bildirərkən Azad İstehlakçılar Birliyinin sədri Eyyub Hüseynov deyib.
O bildirib ki, Səhiyyə Nazirliyi dərman preparatlarının keyfiyyətinin qaldırılması üçün ciddi mübarizə aparır:
"Belə deyirlər ki, həkimlər insanları, baytarla bütün bəşəriyyəti müalicə edirlər. Hələ insanların sağlamlığı ilə bağlı ölkədə uzun zaman problemlər olub. Hazırda isə heyvanlar və bitkilər üçün buraxılan dərmanlarda ciddi problem var. Məndə olan məlumata görə, Qubada 16-17 dəfə ağaclara, bitkilərə dərmanlar vurulur, lakin həşəratlarla mübarizə apara bilmirlər. Heyvanlar üçün istehsal olunan dərmanların tərkibində də çatışmazlıqlar var”.
E.Hüseynov bildirib ki, baytarlıq dərmanlarının tibbi-ekspertizası aparılmalıdır. Bu sahədə ciddi nəzarət olmalı, dərmanların keyfiyyəti qaldırılmalıdır:
"Bəzən kiçik quşların satışını görürük. Bəzən marketlərdə xırda toyuqlar satılır. Bunlar əslində murdar olmuş toyuqlardır. Toyuqlar müəyyən çəkiyə çatdıqdan sonra kəsilib satılmalıdır. Ona görə əhali hər məsələdə diqqətli olmalıdır. Bu sahəyə nəzarət edən dövlət orqanları isə "xeyirçi” mövqeyindən əl çəkməlidir”.
Qeyd edək ki, son günlərdə bölgələrimizdə heyvandarlıq təsərrüfatlarında ciddi tələfatlar baş verib. Kürdəmir rayonun Sığırlı kənd sakini Mahir Həsənovun təsərrüfatında 2 aylıq quşlar tələf olub. Həmçinin Hacıqabuldakı fərdi təsərrüfatda 850 ədəd cücə tələf olub. Ötən gün verilən məlumata görə isə Azərbaycanın cənub bölgəsində gənə xəstəliyi səbəbindən yüzlərlə arı ailəsi tələf olub. Arıların 40 faizinin tələf olmasına səbəb isə gənə xəstəliyinin qarşısını almaq üçün dərman preparatlarının keyfiyyətsiz olmasıdır.
Ayyət Əhməd
