"Türkiyə-Azərbaycan münasibətləri yüksək səviyyədədir. Türkiyə parlamentinin rəhbəri Binəli Yıldırımın Azərbaycana növbəti səfəri münasibətlərin daha da möhkəmlənməsinə hesablanıb”. Bu barədə "sherg.az”a "Sivilizasiyalar və konfliktlər” Analitik Mərkəzinin rəhbəri Əhəd Məmmədli deyib. Ekspertin sözlərinə görə, Azərbaycan-Türkiyə münasibətləri daha üst səviyyədə olmalıdır:
"İki qardaş ölkə arasında viza rejimi nəhayət ki, qaldırılmalıdır. Azərbaycan öz təhlükəsizliyinə görə, ərazisində Türkiyə hərbi bazalarının yaradılmasına icazə verməlidir. Bundan əlavə Rusiya və İranla sərhədlərimizdə türk qoşunları yerləşdirilməlidir. Bunların hamısı Azərbaycanın təhlükəsizliyi naminədir. Sabah Ermənistanla müharibəyə başlayanda şimal və cənub sərhədlərimizdən rahat olmalıyıq.
Bu cür addımlar həm Azərbaycan-Türkiyə münasibətlərini ən yüksək həddə çatdıracaq, həm də Türkiyənin regionda daha da güclənməsinə şərait yaradacaq. Nəzərə alaq ki, indiki dönəmdə Azərbaycanın güclü və böyük Türkiyəyə ehtiyacı var. Azərbaycanın ərazi bütövlüyünə gedən yol məhz qardaş Türkiyədən keçir”.
Xatırladaq ki, Türkiyə Böyük Millət Məclisinin sədri Binəli Yıldırımın rəhbərlik etdiyi nümayəndə heyəti avqustun 28-də Azərbaycana səfərə gəlib. Prezident İlham Əliyev tərəfindən qəbul olunan Binəli Yıldırım Azərbaycan və Türkiyəni regional və beynəlxalq arenada birgə fəaliyyət göstərən iki dost və qardaş ölkə olduqlarını diqqətə çatdırıb. Parlament rəhbəri bu səfərin münasibətlərin gələcək inkişafına təkan verəcəyini deyib.
İsmayıl
