Qafqaz Müsəlmanları İdarəsinin Aparat rəhbəri, hüquq üzrə fəlsəfə doktoru Simran Həsənovun xarici hüquq nəşrlərində bir sıra maraqlı elmi yazıları işıq üzü görüb.
Müəllifin Venesuelanın yüksək elmi reytinqə malik olan "Opsion” jurnalında dərc olunmuş "Postsovet ölkələrində dini təşkilatların əmlakının formalaşması” adlı məqaləsində MDB ölkələrinin dini qurumlarının əmlakının yaranması mənbələrinin xüsusiyyətləri müqayisəli şəkildə araşdırılır, onların hüquqi tənzimlənməsinin özünəməxsusluğuna qiymət verilir. Azərbaycandakı dini birliklərin əmlak vəziyyətini təhlili ilə bağlı məsələlər yazının əsas hissəsini təşkil edir. Dini icmalarımızın maddi-texniki cəhətdən dəstəklənməsi prosesində dövlətin yaxından və təmənnasız iştirakının hüquqi tənzimlənməsi problemlərinə xüsusi diqqət yetirilir.
S.Həsənovun "Dini qurumların idarəetmə orqanlarının formalaşması və fəaliyyəti qaydaları: hüquqi aspektlər” adlanan digər maraqlı bir məqaləsi Ukraynanın nüfuzlu "Hüququn sosiologiyası” dərgisində dərc olunmub. Yazıda dini təşkilatların idarəetmə orqanlarının yaranması və fəaliyyətinə təsir göstərən bəzi hüquqi amillər, o cümlədən bu məsələdə onların nisbi müstəqilliyi və muxtariyyəti problemləri araşdırılır. Müəllif ölkəmizdəki müxtəlif dini konfessiyalara məxsus dini icmaların nizamnamələrini qarşılıqlı şəkildə tutuşduraraq onların idarəetmə sahəsində özünəməxsus cəhətlərini araşdırır.
Turan
