Qolan yüksəkliklərini Dağlıq Qarabağla müqayisə etmək geri zəkalılıqdır
"Ermənistan Qolan yüksəkliklərini İsrail ərazisi kimi tanımalıdır, bu, Qarabağın suverenliyinin beynəlxalq səviyyədə tanınmasına kömək edəcək”. Bunu İsrail politoloqu Aviqdor Eskin deyib. Eskinin fikrincə, Qolan yüksəkliklərinin tanınması Ermənistana Qarabağ üçün yeni status tələb etmək imkanı yaradacaq: "Beynəlxalq siyasi fikirdəki bu yeni istiqamətin hansısa yolla benefitsiarı olmaq üçün Ermənistan Trampın ardınca Qolan yüksəkliklərini tanımalıdır. Sonradan isə Qarabağ üçün xüsusi status tələb etmək lazımdır”. İsrailli politoloqun bu "çağırışı” Ermənistanda bəzi siyasilərin narahatlığına səbəb olub. Onlar bu çağırışda əslində israilli politoloqun Qolan təpələri kimi, Dağlıq Qarabağın da faktiki olaraq işğal edildiyinə diqqət çəkdiyini bildiriblər.
İsrailli ekspertin çağırışını "Şərq”ə dəyərləndirən politoloq Azər Rəşidoğlu deyib ki, Qolan yüksəkliklərini Dağlıq Qarabağla müqayisə etmək geri zəkalılıqdır. Digər tərəfdən analitik bildirib ki, rəsmi Bakının İsrail və eyni zamanda müsəlman ölkələri ilə yaxınlığı ölkənin geosiyasi önəminin göstəricisidir:
"Bakı İran və yaxud Fələstinin narazılığına səbəb ola bilər ehtimalına görə, mühüm bir oyunçu olan İsrail ilə münasibətlərini korlaya bilməz. Azərbaycan bu günə qədər İsraildən 4 milyard 850 milyon dollar civarında hərbi texnika alıb. İmzalanmış müqavilələrin ümumi dəyəri isə 5 milyard dollardır. İsrail öz qazını Azərbaycanla Türkiyə arasında inşa edilən boru xətləri ilə Avropaya nəql etmək istəyir. Bu enerji əməkdaşlığı sayəsində Türkiyə-Azərbaycan-İsrail üçbucağı güclənə bilər. İsrail-Azərbaycan əməkdaşlığının daha bir əhəmiyyəti var. Dünyanın müxtəlif ölkələrində kök salan erməni lobbisi, Türkiyə ilə yanaşı, Azərbaycan əleyhinə də kampaniya aparır. Dağlıq Qarabağ və ətraf rayonların işğalına haqq qazandırmağa çalışır. Buna görə də Azərbaycanın dünyanın müxtəlif ölkələrindəki yəhudi icmalarının dəstəyinə ehtiyacı var ki, erməni lobbisi ilə mübarizədə güclü müttəfiqə malik olsun. İsraildəki 70 min nəfərlik Azərbaycan diasporu isə yəhudi olmasına baxmayaraq, iki ölkə arasındakı əməkdaşlığın genişlənməsidir. Ayrıca, Azərbaycan İsraildən müsir silahlar alır və bu, bizə torpaqlarımızı işğaldan azad etmək üçün vacibdir”.
Siyasi şərhçinin sözlərinə görə, İsrail tərəfindən İranla bağlı Azərbaycana müəyyən təzyiqlər var:
"Bu gün Türkiyə, Pakistan, Səudiyyə Ərəbistanı və digər müsəlman ölkələri Ermənistanla siyasi-diplomatik, iqtisadi əlaqələr qurmadığı halda, müsəlman qonşumuz İran illərdir təcavüzkara qucaq açır. İsrail isə erməniləri müdafiə etmir. Əksinə, Dağlıq Qarabağ münaqişəsində Azərbaycanın hərbi gücünü artırmağa yönələn addımlar atır. Türkiyə, Pakistan və digər müsəlman dövlətləri kimi İran da Ermənistanla işğalçı kimi davransaydı, öz sərhədlərini müsəlman torpaqlarını işğal edən təcavüzkara qarşı qapalı saxlasaydı, Qarabağ münaqişəsi bu qədər uzanmazdı. Tehran isə nəinki Ermənistanla, belə görünür ki, Dağlıq Qarabağdakı separatçı rejimlə də əlaqələri davam etdirir. Bütün bu amillər İsrail ilə əməkdaşlığı zəruri edir. Əlbəttə ki, Bakı Qüds problemində Fələstinin yanındadır. Lakin bu, İsrail ilə münasibətləri korlamaq anlamına gəlmir. Bu baxımdan, artıq İsraildə Azərbaycanın səfirliyinin açılması barədə də düşünmək lazım gəlir və hansısa şərhçinin sərsəmləməsinə önəm vermək lazım deyil”.
İsmayıl
