“İndiki vəziyyətdə daha uğurlu olardı ki, dövlət bu məsələni öz üzərinə götürsün”
"Baku Bus” şirkətinin ötən il üzrə audit hesabatları qeyd olunub. Məlumata görə, 2016-cı ildə "BakuBus” MMC-nin aktivlərinin həcmi 226,143 mln. manata çatıb ki, bu da 2015-ci illə müqayisədə 7,73 faiz azdır.
MMC-nin öhdəlikləri 9,8 faiz azalaraq 177,967 mln. manat təşkil edib. Hesabat dövründə dövlət müəssisəsinin nizamnamə kapitalı 39,84 faiz azalaraq 18,049 mln. manata endiyi halda, dövlət investisiyalarının məbləği 58,41 faiz artaraq 181,697 mln. manata çatıb. 31 dekabr 2016-cı il tarixinə MMC-nin yığılmış zərəri 151 mln. 569,938 min manat təşkil edib ki, bu da 2016-cı illə müqayisədə 54,638 mln. manat və ya 56,37 faiz çoxdur. Beləliklə, dövlət şirkətinin cəmi kapitalı 48,177 mln. manat olub.
2016-cı ildə MMC-nin xalis zərəri 54 mln. 637,619 min manat təşkil edib. 2015-ci ildə bu rəqəm 92 mln. 260,805 min manat idi.
Bəs, "Baku Bus” şirkətinin zərər etməsi gediş haqlarının artmasına zəmin yarada bilərmi? Ümumiyyətlə, bu zərərin baş verməsinin səbəbi nə ola bilər?
Şirkətin təqdim etdiyi hesabatın şəffaf auditi haqqında ictimaiyyətə və ya dövlət orqanlarına məlumat verilməli olduğunu deyən iqtisadçı-ekspert Fuad İsmayılov "Şərq”ə bildirib ki, zərərlərin baş verməsi müxtəlif səbəblərdən ola bilər.
Ekspertin sözlərinə görə, 55 milyon manat ziyanın olması əgər sərnişindaşıma zamanı baş veribsə, bunu Tarif Şurasının qarşısına əsaslandırılmış formada qoymaq lazımdır. Məsələn, əsaslı şəkildə bildirmək lazımdır ki, bu gün yanacağın qiymətinə uyğun sərnişindaşınma fəaliyyəti xeyirsiz bir biznesə çevrilib:
"Yox əgər bunu sübut edə bilməyəcəklərsə, qiymət artımı əsasını qoya bilməzlər. Digər tərəfdən, 55 milyon manat ziyan sərnişindaşınma zamanı baş veribsə, belə qiymətlərin artımı ancaq sosial narazılığa gətirə bilər. Bu nöqteyi-nəzərdən indiki vəziyyətdə daha uğurlu olardı ki, dövlət bu məsələni öz üzərinə götürsün”.
Yeganə Bayramova
