"Bəsit düşüncəli, öz xalqına qarşı düşmən mövqeyi ortaya qoyan, çıxışları ritorika və tərbiyəsizlikdən başqa bir şey olmayan Orduxan Teymurxan adlı şəxsin çıxışları hər kəsə toxunur”.
Bunu "Sherg.az”a Hollandiyadan sığınacaq alan Orduxan Teymurxan adlı azərbaycanlının ermənipərəst çıxışlarına münasibət bildirərkən "Xalq cəbhəsi” qəzetinin baş redaktoru, politoloq Elçin Mirzəbəyli deyib.
O diqqətə çatdırıb ki, Azərbaycana qarşı Ermənistanın mövqeyini müdafiə edən şəxs artıq azərbaycanlı deyil:
"Həmin şəxs informasiya cəbhəsində yer alıb Azərbaycana qarşı qarayaxma kampaniyası aparması ilə bir erməninin səngərdə dayanıb, Azərbaycan əsgərlərini atəşə tutması arasında heç bir fərqi yoxdur. Orduxanın çıxışları hüquqi müstəvidə həqiqəti əks etdirmir, yalandan, Azərbaycana qarşı çamur atmaqdan başqa bir şey deyil. O, erməni diasporunun maraqlarına xidmət edir. Ola bilər, Orduxanı nəzarətə götürən hansısa xüsusi xidmət orqanları ondan istifadə etsin. Çox güman ki, Ermənistan xüsusi xidmət orqanları da Azərbaycana qarşı qarayaxmalar atmaq üçün bu şəxsin çıxışlarına dəstək verir.
Azərbaycanda məhkəmə keçirilib, Orduxanın yalan çıxışlarına, Azərbaycan haqqında əsassız iddialarına qarşı müvafiq qərarlar qəbul etmək olar. Artıq sonradan həmin şəxsin beynəlxalq axtarışa verilməsi də mümkündür.
Digər tərəfdən mən o ləyaqətsiz şəxsin bu qədər böyüdülməsinin tərəfdarı deyiləm. O, niskin canlıdan başqa bir şey deyil. Onun haqqında hazırda danışanda belə mənəvi əzab çəkirəm”.
Qeyd edək ki, Hollandiyada sığınacaq alan Orduxan Teymurxan daha bir ermənipərəst çıxış edib. O, çıxışı zamanı ermənilərin vəhşilik etmədiyini bildirib. Orduxan Teymurxan işğal altında olan Azərbaycan torpaqlarında ermənilərin bilərəkdən qəbirləri, məscidləri dağıtmadığını deyib.
Aysel Aslan
