"Almaniya Ermənistan-Azərbaycan Dağlıq Qarabağ münaqişəsi ilə bağlı hansısa məsələlərdə yardımçı olar, müəyyən dərəcədə iştirakı arta bilər”.
Bunu "Sherg.az”a Almaniya kansleri Angela Merkelin Azərbaycana səfəri, Ermənistan-Azərbaycan Dağlıq Qarabağ münaqişəsi barədə fikirlərə münasibət bildirərkən sabiq xarici işlər naziri Tofiq Zülfüqarov söyləyib. Onun sözlərinə görə, rəsmi Berlin danışıqların indiki mərhələsində ciddi rola malik deyil:
"Sadəcə olaraq, Almaniya hansısa proseslərə dəstək verə bilər. Lakin sülh danışıqlarının aktivləşməsi, Ermənistanın mövqeyinin dəyişməsində bu dövlətin böyük imkanlarına inanmıram”.
Almaniyanın ATƏT-in Minsk qrupunun tərkibində fəaliyyətinə gəlincə, T. Zülfüqarov bildirib ki, bəzi mərhələlərdə bu dövlət fəallıq nümayiş etdirirdi:
"Lakin sülh prosesi böhran içərisindədir. Bu o qədər dərindir ki, Almaniyanın prosesi böhrandan çıxarmaq imkanları yetərincə deyil. Danışıqlar hər hansı fayda verərsə, razılıq əldə edilib, qərarların icra mərhələsi başlayarsa, Almaniya müəyyən dəstək göstərə bilər.
Almaniya kansleri Angela Merkelin Azərbaycana son səfərinin əsas məqsədi enerji məsələləri ilə əlaqədar idi. Sözügedən müzakirələr rəsmi Berlin və Azərbaycan, qismən də Gürcüstan arasında davam etdiriləcək”.
Qeyd edək ki, Almaniyanın nüfuzlu kütləvi informasiya vasitələri Federal Kansler Angela Merkelin Azərbaycana səfərini geniş işıqlandırıb. "ARD” telekanalının rəsmi internet səhifəsi Azərbaycanın enerji sahəsində Almaniya üçün mühüm tərəfdaş ölkə olduğunu yazıb.
Məqalədə Angela Merkelin Azərbaycan Prezidenti İlham Əliyevlə görüşünə toxunularaq bildirilir ki, liderlərin əsas müzakirə mövzuları enerji məsələləri və Dağlıq Qarabağ münaqişəsinin həlli yolu olub. Vurğulanır ki, Almaniya Dağlıq Qarabağ münaqişəsinin həllində vasitəçilik etməyə hazırdır. Yazıda Cənub Qaz Dəhlizi layihəsinin Avropa üçün əhəmiyyətinə toxunulub.
Aysel Aslan
