Rusiya və Türkiyə nümayəndələrinin iştirakı ilə birlikdə Rusiya-Türkiyə Araşdırmaları Mərkəzi qurulub. Yeni yaradılan TÜRAM-ın əsas məqsədi iki ölkə arasında əlaqələri daha da inkişaf etdirməkdən ibarət olacaq. Mərkəzin yaradıcıları arasında Türkiyənin Rusiyanı yaxından tanıyan akademikləri, jurnalistləri və iş adamları da var.
Ekspertlərə görə, bu cür beyin mərkəzlərinin fəaliyyəti gərgin münasibətdə olan iki ölkə arasındakı əlaqələri yenidən normallaşdıra bilər. Bu barədə "Şərq”ə danışan politoloq İlqar Vəlizadə belə bir mərkəzin yaradılmasını çox praqmatik addım sayıb: "Mərkəzin yaradılması gələcək addımlara hesablanan bir təşəbbüsdür. Bütün anlaşılmazlıqlara baxmayaraq tərəflər başa düşürlər ki, münasibətlərin gərginləşməsinin perspektivi yoxdur. Düzdür, hazırda böhran pik həddinə çatıb, amma buna baxmayaraq iki ölkə bir-biri ilə əməkdaşlıqda maraqlıdır. Bildiyiniz kimi, hazırda Rusiya Türkiyəyə külli miqdarda qaz satır. Eyni zamanda Türkiyə rus bazarlarına kənd təsərrüfat mallarının böyük bir qismini çıxarır. Rusiyaya məxsus kənd təsərrüfat məhsulları, xüsusən buğda Türkiyəyə ixrac edilir. Həmçinin, kənd təsərrüfat nazirlikləri səviyyəsində iki ölkə arasında dialoq aparılır”. Ekspertin sözlərinə görə, ötən müddət ərzində tərəflər arasında imzalanmış sazişlər ləğv olunmayıb. Sadəcə olaraq həyata keçirilməsi müəyyən mənada dondurulub və ya ləngidilib: "Gərginlik yaranandan etibarən hər iki tərəf böyük maliyyə itkisi ilə üzləşib. Fikrimcə, belə mərkəzlər mövcud vəziyyəti soyuq başla analiz edəcək və lazımi təklifləri siyasi dairələrə çatdıracaq. Yəqin ki, bundan sonra Türkiyə-Rusiya dialoqu kritik mərhələdən çıxaraq faydalı mərhələyə qədəm qoyacaq”.
İsmayıl
