"Dini etiqad haqqında” qanuna dəyişiklik ediləcək. Dəyişikliyə əsasən, dini ədəbiyyatların və əşyaların satışına görə dövlətə rüsum ödəniləcək. Bu barədə məlumat verən Milli Məclisin İnsan hüquqları komitəsinin sədri Rəbiyyət Aslanova bildirib ki, qanunun mövcud maddəsinə görə vətəndaşlar və dini qurumlar istədikləri dildə dini ədəbiyyat, əşya və materiallara sahib ola, istifadə edə və satış məntəqələrində sata bilirdilər.
Ancaq bundan sonra dini ədəbiyyat və dini təyinatlı əşyaların satışına görə nəzarət markası tətbiq olunacaq. Markaların alınmasına görə ödənilən vəsaitin dövlət büdcəsinə köçürülməsi və rüsumun məbləği müvafiq icra hakimiyyəti orqanları tərəfindən müəyyən ediləcək. Qanun bir sıra şəxslərdə narazılıq yaratsa da, əksəriyyət din sahəsinə nəzarətin zəruri olduğu fikrindədir. Qarabağ Seyid Ocaqlarının təmsilçisi, şərqşünas Seyid Camal Əzimbəyli son dövrlər dini sahədə atılan addımları təqdirəlayiq hesab edib. Xüsusilə dini komitənin və QMİ-nin bu məsələdə həssaslığını və düşünülmüş şəkildə hərəkət etməsini müsbət dəyərləndirib. Amma bununla yanaşı, ekspert görülən işlərin az olduğunu da etiraf edib: "Xaricdən dini ədəbiyyatların gətirilməsinə və satışına nəzarət edilməsi vacibdir və dövlətin üzərinə düşən məsuliyyətdir. Bunu problem yaradacaq amil kimi dəyərləndirmək düzgün deyil. Amma görülən müsbət işlərlə yanaşı, problemləri də dilə gətirməliyik. Həqiqəti gizlətmək olmaz. Əgər biz Azərbaycanın bütövlüyünü, din-dövlət münasibətlərinin möhkəmliyini istəyiriksə, dini mühitin Suriya və İraqdakı kimi olmasını arzulamırıqsa, problemləri masaya yatırıb müzakirə etməliyik. Bu gün dini sahədə əsas problem radikallardır. Ona görə də ilk növbədə radikal qrupların kökünü kəsməyin yollarını axtarmalıyıq. Bir şeyi unutmayaq ki, dini qruplaşmalar kitab satmaqla yox, daha çox internetdən, sosial şəbəkələrdən istifadə edərək öz tərəfdaşları ilə əlaqə qurur, onları ələ alırlar”. S.C.Əzimbəylinin sözlərinə görə, maarifləndirmə prosesini sürətləndirmək və mütəmadi həyata keçirmək lazımdır: "Mövsümi xarakter daşıyan maarifləndirmə fayda verə bilməz. Prosesi praktik-əməli fəaliyyətə çevirmək lazımdır. Cəmiyyətin, toplumun aynası sayılan insanlar kənd-kənd, ev-ev gəzərək gənclərlə təbliğat aparmalı, ilk növbədə radikal qruplara üzv olan insanlarla ünsiyyət qurmalıdırlar. Yenə deyirəm, inzibati metodlar gözəldir, amma proqramlı şəkildə maarifləndirmə işi aparmasaq, gələcəkdə təhlükəli vəziyyətlə üzləşə bilərik”.
İlahiyyatçı-alim Hacı Atif İsmayılov da sözügedən dəyişikliyi müsbət qiymətləndirib. İlahiyyatçı deyib ki, qanuna edilən dəyişiklik ictimaiyyət arasında müəyyən narazılıq yaratsa da, dövlətin mənafeyini və təhlükəsizliyini qorumaq üçün dini ədəbiyyatların satışına nəzarət labüddür: "Hər sahədə olduğu kimi, dindən də öz məqsədləri üçün istifadə edən müəyyən dairələr, şəxslər var. Hər hansı bir din öz əqidəsini insanlara müxtəlif yolla çatdırır. Əksər hallarda dini ideyalar müxtəlif kitablar, broşuralar vasitəsi ilə təmənnasız olaraq insanlara aşılanır. Çünki cəmiyyətdə pul verib dini ədəbiyyat alanların sayı çox azdır. Bu səbəbdən pulsuz paylanılan ədəbiyyatlar daha çox insana nüfuz edir. Bu da əksər hallarda xüsusi maraqlara xidmət edir”.
İsmayıl
