"Prezidentin problemli kreditlərin ödənilməsi ilə bağlı verdiyi sərəncam onu göstərir ki, əhalinin sosial müdafiəsinin miqyası daha da genişlənir”.
Bu sözləri "Sherg.az”a açıqlamasında "Səs” qəzetinin baş redaktoru Bəhruz Quliyev deyib.
Onun sözlərinə görə, ölkə başçısı 2003-ci ildən etibarən xalqın rifahı barədə düşünür:
"Cənab prezident daim vətəndaşların yanındadır. Onun mütərəqqi addımları artıq 16 ildir ki, davam edir. 2018-ci ildəki seçkilərdə idarəetmənin optimallaşdırılması, sosial paketin həyata keçirilməsi mövcud platformaya daxil idi. Bu proses artıq yeni bir mərhələyə qədəm qoyub. Ölkə başçısı əhalinin sosial rifahının yaxşılaşmasının yeni bir modelini ortaya qoydu. Məsələlərin kompleks həlli istiqamətində dövlətin konsepktual yanaşması baş tutdu. Bütün sferanı əhatə edən insanlar prezidentin atdığı addımlardan bəhrələnirlər. Problemli kreditlərlə bağlı sərəncamdan öncə tələbə və gənclər, şəhid ailələri, veteranlar və digər təbəqələrlə bağlı atılan addımlar bir daha göstərdi ki, Prezident mövcud platformalı məsələləri sözdə deyil, əməli ilə həll edir.
Məlumdur ki, manatın devalvasiyası dövründə əhalinin banklarla problemləri var idi. Bu problemlərin aradan qaldırılmasında dövlət çox mühüm addım atdı. Ölkə başçısının sərəncamı həm bankların inkişafına verilən dəstək, həm də vətəndaşla-bank arasında olan problemlərin həlli istiqamətində atılmış ən vacib və genişmiqyası bir addım idi.
Hesab edirəm ki, bu tip sərəncamlar ölkə başçısının sosial siyasətinin prioritet istiqamətidir. Ümumiyyətlə, əhalinin sosial müdafiəsi, kiçik və orta sahibkarlığın inkişafı hər zaman prezidentin siyasətinin mərkəzində olub. Düşünürəm ki, belə addımlar daha da genişlənəcək və gələcəkdə bundan da möhtəşəm sərəncamların şahidi olacağıq”.
Yeganə Bayramova
