"Moskvada çeçenlərlə Azərbaycanlılar arasında baş verən hadisə xüsusi kəşfiyyat orqanlarının hazırladığı təxribat idi”.
Bunu "Sherg.az”a açıqlamasında siyasi elmlər doktoru, professor Cümşüd Nuriyev deyib.
Analitik bildirib ki, ssenarini hazırlayanlar çeçenlərin də, Azərbaycanlıların çox qürurlu xalqlar olduqlarını yaxşı bilirlər:
"Məqsəd iki milləti üz-üzə qoymaq və qarşıdurmadan yararlanmaq idi.
Allaha şükür olsun ki, onların təxribatı uğurlu alınmadı. Şübhəsiz ki, kəşfiyyat orqanları ilə bərabər bu məsələdə ermənilərin də əli var. Çünki ermənilər hər zaman çalışıblar ki, Azərbaycanla bağlı qarşıdurma yaratsınlar və bundan faydalansınlar.
Azərbaycan tərəfi hadisəyə vaxtında reaksiya verdi. Həm Prezidentin köməkçisi Əli Həsənov, həm Qafqazın şeyxi, həm də səfir Polad Bülbüloğlu məsələyə lazımi şəkildə münasibət bildirdilər. Eyni zamanda Çeçenistan rəhbərliyi də hadisəyə böyük diqqət ayırdı və nəticədə problem böyümədən qarşısı alındı”.
Professor bildirib ki, bu, bir siqnal idi, ona görə də kifayət qədər ehtiyatlı olmalıyıq:
"Ola bilər, bu tipli təxribatlar sabah tatarlarla, başqırdlarla və başqa müsəlmanlar planlaşdırılsın. Vurğulamaq lazımdır ki, Çeçenistan və Azərbaycan bu sınaqdan çox uğurla çıxdı. Amma bu həm də daxilə hesablanmış bir məsələ idi. Yaxşı olar ki, bəzi adamlar ağıllı olsunlar və dövlətin maraqlarına qulluq etsinlər. Qarşıdurma heç vaxt bizim ölkəyə xeyir gətirməyəcək. Bundan ancaq ermənilər yararlanacaq”.
İsmayıl
