Ötən gün terrorçu təşkilat olan PYD-nin keçmiş lideri Saleh Müslüm Çexiyanın paytaxtı Praqada saxlanılıb. Türkiyə prezidenti Rəcəb Tayyib Ərdoğan Çexiya hökumətindən terrorçu başının Ankaraya təhvil verilməsini istəyib. Türkiyə baş nazirinin müavini Bəkir Bozdağ terrorçu Saleh Müslimin ekstradisiyası üçün dosyenin Çexiyaya çatdırıldığını deyib:
"Saleh Müslimin son Avropa səyahəti çərçivəsində Çexiyada bir oteldə qaldığına dair məlumat bizə daxil olunca Türkiyə İnterpolu onu Çexiyadan tələb etdi. Saxlanılması, müvəqqəti həbsi və ekstradisiya tələbi çatdırıldı. Onlar da lazım olanı etdilər. Hazırda aramızdakı müqaviləyə əsasən görülməli işlər var. Gözləntimiz Türkiyəyə ekstradisiyası istiqamətindədir”.
Məsələ ilə bağlı danışan politoloq Elxan Şahinoğlu deyib ki, PYD təşkilatının keçmiş lideri Saleh Müslümün İnterpolun xətti ilə Çexiyada həbs edilməsi Türkiyənin uğuru sayıla bilər:
"Ancaq məsələ heç də sadə deyil. İndi əsas sual budur. Çexiya Saleh Müslümü Türkiyəyə ekstradisiya edəcəkmi? Məsələ burasındadır ki, Avropadakı PKK militanları və onların Avropanın siyasi kuluarlarındakı dəstəkçiləri əllərindən gələn hər şeyi edəcəklər ki, Saleh Müslüm Türkiyəyə göndərilməsin. Abdullah Öcalanın həbsini xatırlayın. Neçə ölkə PKK-nın liderini Türkiyəyə təhvil verməmək üçün Öcalanı ölkədən-ölkəyə göndərdilər.
Onu əvvəlcə Suriyadan qovdular, oradan Rusiyaya keçdi, sonra İtaliya və Yunanıstana. Ən nəhayət, Keniyada gizli şəkildə həbs olundu və Türkiyəyə gətirildi. Onu da nəzərə almaq lazımdır ki, Çexiyadakı müəyyən mərkəzlərin PYD militanları ilə əlaqələrinə dair informasiyalar dolaşır. Elə Saleh Müslüm də Praqaya getməklə arxayın olub ki, Çexiya polisi onu həbs etməz”.
İsmayıl
