"Qışın öz parametrlərinə uyğun keçməməsi xəstəliklərin vüsət almasına gətirib çıxarır”.
Bunu "Sherg.az”a ölkəmizdə qış boyu qar yağmamasının insanların səhhətinə təsirindən danışarkən tibb elmləri doktoru, professor Adil Qeybulla deyib.
O xatırladıb ki, dağlıq rayonlarda qış aylarında qar yağsa da, ümumilikdə Azərbaycan qarlı ölkə deyil:
"İnsanların ətraf mühitə adaptasiya imkanları yüksəkdir. Sadəcə qışın öz temperatur parametrlərinə uyğun keçməməsi bəzi virus infeksiyalarının vüsət almasına səbəb olur. Xüsusi ilə kəskin respirator xəstəliklərin yayılması müşahidə edilir. El arasında bu cür virusları qrip adlandırırlar. Lakin bu qrip deyil. Yuxarı tənəffüs yollarında fəallaşmış virus və infeksiyaların fəallaşaraq qripəbənzər şəkildə özünü göstərməsidir. İnsanlar artıq bir-birini yoluxdurur, öz aralarında isə bunu qrip adlandırırlar. Amma qrip karantin infeksiyasıdır. Ümumdünya Səhiyyə Təşkilatı infeksiyanın yayılma dövrlərində bununla bağlı açıqlama yayır, qorunma yollarını əhaliyə çatdırır.Əsas məsələ belə hallarda insanlara təbliğatın zəif olmasıdır. Elektron KİV-lərdə, televiziyada yaranmış vəziyyətlə bağlı məlumatlandırıcı verilişlər, yazılar görmürük. Əhali arasında sanitariya maarifi işi yüksəldilməlidir.
Dövlətin müəyyən tədbirləri öz yerində olmalıdır. İcbari tibbi sığortanın olmadığı şəraitdə, ən azı müəyyən məsələlərdə profilaktik tədbirlərin görülməsi vətəndaşların işini yüngülləşdirmiş olar. Ona görə, işimizin təşkilatı məsələsində bunu nəzərə almalıyıq, nəinki iqlimin gedişinə müdaxilə etmək”.
Aysel Aslan
