Amerikalı mütəxəssislərin araşdırmalarına görə, hər gün çox miqdarda duzun qidada istifadə edilməsi bağırsağın immun sistemində dəyişikliklərə səbəb ola bilər.
Qeyd olunur ki, üç həftə müddətində duzdan həddən çox istifadə beyində qan dövranını da azaldır. Bununla bağlı müşahidə siçanlar üzərində aparılıb. Duzun həcminin azalmasından sonra siçanların orqanizmində normal rejimin bərpa olunduğu müşahidə edilib.
Ümumdünya Səhiyyə Təşkilatı gün ərzində beş qramdan çox olmayaraq duzdan istifadə etməyi məsləhət görür.
Lakin bu məsləhətin gündəlik həyatımıza heç bir aidiyyəti yoxdur. Millət olaraq duzdan çox istifadə etməyi sevirik. Yeməklərdə, salatlarda normadan artıq duzdan istifadə bizim üçün adi gəlir. Sonrakı fəsadlardan isə xəbərimiz yoxdur.
Diaqnoz Tibb Mərkəzinin həkimi Şahvələd Məmmədov "Şərq”ə açıqlamasında duzdan çox istifadənin müəyyən yaşdan sonra ürək-damar və digər xəstəliklərə səbəb olduğunu deyib. Həkimin sözlərinə görə, duzdan çox istifadənin ziyanları uzun illərdən bəri sübut olunub:
"Təzyiq xəstəsi olanlara duzu minimuma endirməyi məsləhət görürük. Həddindən artıq istifadə olunduğu zaman insanlarda maddələr mübadiləsi, beyin, qan dövranı və daxili orqanların əksəriyyətində duz mübadiləsi pozğunluğu yaranır. Təbii ki, hər bir insanın gündəlik olaraq duza ehtiyacı var. Bu orqanizmin tələbidir, duzsuz yaşayış olmaz. Bugünkü yaşam tərzimiz, daha çox da regionlarda duzlu və yağlı yeməklərdən istifadə olunur.
El arasında duzlaşma, "artroz” deyilən xəstəlik mövcuddur. İnsan var ki, ovucla duz yeyir, amma onun oynağında heç bir problem olmur. Deməli, onda duz mübadiləsi pozğunluğu yoxdur. İnsanların böyük əksəriyyətində isə duz mübadiləsi pozğunluğu var. Yəni maddələr mübadiləsinin bir qolu duz mübadiləsi pozğunluğudur.
Bu pozğunluq olan insanlarda duzlaşma, artroz, artrit və digər xəstəliklər olur. Ona görə də duzun həddən çox istifadə olunması müxtəlif xəstəliklərə səbəb olur. Tibb elmində maddələr mübadiləsi pozğunluğu ilə bağlı xəstəliklər qrupu var. Məsələn, piylənmə, şəkər, hipertaniya, ürək xəstəlikləri, bütün damarlarda kirəcləşməni qeyd edə bilərik. Bütün bunların başında duz mübadiləsi pozğunluğu durur”.
Yeganə Bayramova
