Əfv komissiyasının iclaslarının başlanması minlərlə insanın qəlbində ümid işığı yandırıb. Həm cəzaçəkmə müəssisələrində olanlar, həm də onların ailələri, yaxınları imzalanacaq Əfv fərmanını səbirsizliklə gözləyir.
Əfv komissiyasında keçirilmiş iclasla bağlı komissiyanın üzvü, «525-ci qəzet»in baş redaktoru Rəşad Məciddən məlumat aldıq. R.Məcid «Sherg.az»a bildirdi ki, komissiyaya 1000-dən çox müraciət daxil olub: «Müraciətlərə baxılmasına başlanılıb.
Bir ay, ay yarım ərzində bu müraciətlərə baxılacaq. İşlər çoxdur. Komissiyanın iclaslarının hər həftə keçirilməsi nəzərdə tutulur. İclaslar həftədə bir dəfə keçirilsə, müraciətlərə baxılması da sürətlənəcək».
R.Məcid qeyd etdi ki, komissiya üzvlərinə fərdi müraciətlər də daxil olur:
«Fərdi müraciətlər həmişə olur. Cənab Prezidentə şəxsən müraciət edənlər var. Komissiya üzvlərinin hər birinə fərdi müraciətlər olur. Mənə 20-yə yaxın müraciət gəlib. Bütün bu müraciətlərə əfv sektorunda baxılır, şərtlərə uyğun gələnlər komissiyanın iclasında müzakirəyə çıxarılır».
R.Məcid Novruz bayramı ərəfəsində Əfv fərmanının imzalanacağını istisna etmədi:
«Əfv fərmanının imzalanması Prezidentin səlahiyyətindədir. Ola bilər Novruz bayramı münasibətilə Əfv fərmanı imzalansın, ya da Cümhuriyyətin 100 illiyi münasibətilə may ayında».
Məlahət
