Bizim təhsil sistemində bir az yanlışlıqlar var. Ali məktəbə qəbulda həm buraxılış imtahanının, həm də ali məktəbə qəbul imtahanlarının nəticələri toplanır. Orta məktəb səviyyəsi, üstəgəl, ali məktəbə qəbul imtahanı göstəricisi. Bu, şagirdlərə ali məktəbə qəbulda çətinlik yaradır
Gürcüstan orta məktəblərində buraxılış imtahanları ləğv olunur. Bu, Gürcüstan təhsil sistemi ilə əlaqədar yeni modelin hazırlanması ilə bağlıdır. Sənəddə 2020-ci ildən etibarən ölkənin ictimai məktəblərində buraxılış imtahanlarının ləğvi nəzərdə tutulub.
Təhsil sistemində nəzərdə tutulan yeniliklər 2020-ci ildən həyata keçiriləcək. 2019-cu ilin 11-ci sinif şagirdləri isə buraxılış imtahanları verməyəcəklər. Buraxılış imtahanları bu il 12-ci sinif şagirdləri üçün qüvvədə qalacaq.
Əsas yeniliklərdən biri də ali məktəblərə qəbulla bağlıdır. 2020-ci ildən başlayaraq ali məktəblər hər bir proqram üzrə baryeri özləri müəyyənləşdirəcək. Gələn ildən etibarən milli imtahanlar 4 fənnin əvəzinə 3 fənn üzrə keçiriləcək.
Gürcü dili və ədəbiyyatı, xarici dil üzrə imtahanlar bütün abituriyentlər üçün məcburi olacaq. Üçüncü məcburi fənn isə ali təhsil müəssisəsinin proqramına əsasən müəyyən ediləcək. Belə ki, texniki istiqamət üzrə abituriyentlər riyaziyyat, humanitar istiqamət üzrə isə tarix fənnindən imtahan verməli olacaqlar.
Gürcüstan təhsil sistemindəki yeniliyi şərh edən Əməkdar müəllim Almaz Həsrət «Şərq»ə açıqlamasında bunu alqışladığını bildirdi:
- Əhsən deyirəm, Gürcüstan təhsilinə. Mən bu yeniliyi dəstəkləyirəm və bu modeli işləyib hazırlayanları alqışlayıram. Hər bir layihə, yenilik uzağı 5 ilə nəticəsini göstərir. 5 ildən sonra görəcəyik, Gürcüstan təhsilində hansı irəliləyişlər baş verir. Bizim təhsil sistemində bir az yanlışlıqlar var. Ali məktəbə qəbulda həm buraxılış imtahanının, həm də ali məktəbə qəbul imtahanlarının nəticələri toplanır. Orta məktəb səviyyəsi, üstəgəl, ali məktəbə qəbul imtahanı göstəricisi. Bu, şagirdlərə ali məktəbə qəbulda çətinlik yaradır.
Tutalım, riyaziyyat fənnini «əla» bilən şagird qəbul imtahanında hansısa digər fəndən uğur qazana bilmədikdə, ümumi göstərici aşağı hesablanır, nəticədə riyaziyyatı «əla» bilən, bu sahəyə marağı olan şagird ali məktəbdən kənarda qalır. Bizdə vəziyyət elədir ki, şagird bir fəndən 2 dəfə imtahan verməli olur.
Bu da şagird üçün, abituriyent üçün əlavə yükdür, ağırlıqdır. Amma görürük ki, Gürcüstanda ayrı-ayrı fənlər üzrə yüksək mütəxəssis hazırlamağın yolunu tapıblar. Ana dili, hansı ki, onu bilmək sorğu-sualsız mütləqdir və bir də xarici dilə üstünlük verilir. Düşünürəm, xarici dilə ona görə üstünlük verirlər ki, özünə ixtisas seçmiş abituriyent seçdiyi ixtisasa uyğun fənni «əla» bilirsə və üstəlik də xarici dili yaxşı bilirsə, gələcəkdə ondan yüksək mütəxəssis hazırlamaq olar, məntiqi ilə hərəkət edirlər. Bu da tamamilə doğrudur.
Gürcüstanda ali məktəblərin qəbul baryerini özlərinin təyin edəcəyi də doğru addımdır. Deməli, hər bir ali məktəb yüksək ixtisaslı kadr hazırlığını üzərinə götürmüş olur. Abituriyentlər istəklərinə və bacarıqlarına uyğun yerləşdirilir. Hesab edirəm ki, Gürcüstan təhsil işçiləri gözəl təşəbbüs irəli sürüblər. Biz də gərək şagirdlərin, abituriyentlərin qarşısına sədd qoymayaq.
Məlahət
