"Ermənistandakı proseslər heç də müsbət nəticə verməyəcək".
Bunu "Sherg.az”a Ermənistandakı son vəziyyəti dəyərləndirərkən Qarabağ Azadlıq Təşkilatının (QAT) sədri Akif Nağı bildirib.
Onun sözlərinə görə, yaxın gələcəkdə Ermənistan üçün yaxşı perspektiv gözlənilmir:
"Separatçı ölkənin siyasi və iqtisadi durumu bərbaddır. Ermənistan xalqının düşdükləri və düşəcəkləri vəziyyətdən necə çıxacağını demək çox çətindir. Amma Nikol Paşinyan qərbin dəstəyi ilə hakimiyyətə gəlib və onların sifarişlərini yerinə yetirməlidir.
Qərbin də istəyi Ermənistanda Rusiyanın təsirini azaldıb, öz imkanlarını genişləndirməklə bağlıdır. Hətta bu istiqamətdə konkret işlər gedir. Ermənistanda Rusiyanın silah monopoliyası var. İndiyə qədər işğalçı ölkəyə şimal qonşumuz silah satıb, yerləşdirib.
Hazırda ABŞ bu istiqamətdə Rusiyanın monopoliyasını aradan qaldırmağa çalışır. Həmçinin ABŞ siyasi cəhətdən Ermənistanı tam nəzarətinə götürmək istəyir. Bu da rusiyapərəst və qərbpərəst qüvvələr arasında qarşıdurmaya səbəb olur. Eyni zamanda əvvəllər Rusiyanın Ermənistanı dəstəkləməyinə baxmayaraq ermənilərdə şimal qonşumuza qarşı mənfi münasibət var.
Məhz N.Paşinyan və Bako Saakyan arasında qarşıdurma bundan qaynaqlanır. N.Paşinyan çalışır ki, qondarma rejimin rəhbərliyinə öz xəttindən olan adamları gətirsin. Bütün bunlar qeyri-sabit ölkədə gərginliyi daha da artırır.
Həmçinin N.Paşinyan hakimiyyətə böyük vədlər verərək gəlib. Hazırda onları gerçəkləşdirməyə imkan yoxdur. Ermənistanın sosial, iqtisadi vəziyyətini düzəltmək mümkünsüzdür. Bu fonda da separatçı ölkədə müəyyən gərginliklər yaşanır. Rusiyanın Ermənistandakı mövqeyini itirmək istəməməsi və işğalçı ölkənin qərbyönümlü siyasəti orada vətəndaş qarşıdurmasına səbəb ola bilər. Ümumiyyətlə, yaxın gələcəkdə Ermənistanın vəziyyəti yaxşı olmayacaq”.
Kənan Eynuroğlu
