Azərbaycan məsələləri üzrə erməni ekspert Taron Ovannisyan iddia edib ki, Dağlıq Qarabağ münaqişəsinin tənzimlənməsi üzrə danışıqlar prosesi yenilənənə qədər Bakı hərbi əməliyyatlara əl atmayacaq. Erməni ekspert bildirib ki, indiki məqamda bunu etmək Azərbaycan üçün sərfəli deyil:
"Hərbi əməliyyatlara başlamaq kobud dillə desək, Bakının ATƏT-in Minsk Qrupunun həmsədrlərini saya salmaması və danışıqlar prosesinə qoşulmaq istəməməsi anlamına gəlir”. Ovannisyan Azərbaycanı "danışıqların nəticəsiz olması faktını irəli sürərək vəziyyəti gərginləşdirməkdə” də suçlayıb: "Razılaşmalar əldə olunmazsa, gərginlik artacaq. Hazırda tərəflər həmsədr ölkələrin və dövlət başçılarının vasitəçiliyi ilə danışıqlar üçün zəmin axtarıb tapmağa çalışırlar”.
Erməni siyasi şərhçinin iddialarını "Şərq”ə dəyərləndirən siyasi şərhçi Anar İmanov bildirib ki, bu açıqlama Ermənistanın rəsmi Bakının addımlarından qorxduğunu göstərir: "İstər sülh, istərsə də hərb yolu Ermənistanı bərk narahat edir. Çünki işğalçılar anlayırlar ki, gec-tez Azərbaycan öz torpaqlarını qeri qaytaracaq.
Hadisələrin gedişatı Ermənistanın xeyrinə deyil. Sülh və ya hərb yolu, nə olursa-olsun, sonda Ermənistan Azərbaycanın işğal etdiyi torpaqları qaytarmalıdır, başqa çıxış yolu yoxdur. Şahmatda buna "suqsvanq”, yəni hər hansı gedişin əlverişsiz nəticə ilə başa çatan mövqeyi deyilir”.
Analitik bildirib ki, Ermənistan ATƏT-in Minsk Qrupundan əl çəkmək istəmir:
"İrəvan mənasız Minsk Qrupundan çox razıdır. Ermənistan Azərbaycanın torpaqlarını işğal edib və ATƏT-in Minsk Qrupunun fəaliyyətsizliyi işğalçının xeyrinədir. Ona görə də Ermənistan bu qrupdan iki əllə, iki ayaqla yapışıb. Bu qrup işğalçının son ümididir. Ermənistanda düşünürlər ki, bu cür absurd açıqlamalarla vaxtı uzada biləcəklər. Amma artıq vəziyyət dəyişib. Azərbaycanın inkişafı, hərbi gücünün artması işğalçıya heç bir şans saxlamır. Nəticə Ermənistana indidən bəllidir və mən əminəm ki, yaxın gələcəkdə bu cür absurd açıqlamaların sayı çoxalacaq”.
İsmayıl
