Tanınmış meyxanaçı Namiq Qaraçuxurlu gənc ifaçıların ünvanına tənqidi fikirlər səsləndirib: "Faiq Ağayev və o səviyyədə olan sənətçilərə yaxşı mənada ürəyim ağrıyır. Çünki meydanda elə adamlar var ki, biabırçılıqdır. Mənim hələ neçə illik təcrübəm yoxdur, xalq artisti deyiləm, belələrindən qaçıram. Görün onlar nələr çəkir.
Sanki qapılar açılıb, sənətə aidiyyəti olmayan adamlar birdən-birə gəlib sənətçi olublar. Acınacaqlıdır. Sözüm peşəkar insanlaradır: qətiyyən dayanmaq olmaz, meydan lazımsız adamlara verilməməlidir. Düşünürəm ki, o lazımsız adamlar da nə vaxtsa öz yollarına gedəcəklər. Amma neçə ildir gözləyirik, hələ bir şey yoxdur. Peşəkarlar onları rəndələməlidirlər. İstər jurnalistlər, istər televiziya işçiləri ağı qaradan seçməlidirlər. Peşəkarları elələrinə qurban vermək olmaz”.
Faiq Ağayevlə də əlaqə yaradıb Namiq Qaraçuxurlunun açıqlamasına münasibət öyrənməyə çalışdıq.
Xalq artisti Faiq Ağayev "Şərq”ə açıqlamasında "Düz sözə nə deyəsən? Əhalinin bir qisminin fizioloji tələbatlarını ödəməkçündür bu tip "oxuyanlar” və təbii ki, uzunömürlülük onlarlıq deyil.
Səhnə ciddi bir anlayışdı. Sənətkarlar bu məsuliyyəti dərk edir və sənət üçün fəaliyyət göstərməyə üstünlük verirlər. Tamaşaçı üçün hər kəsin səviyyəsi bəllidir”.
Tahirə
