Ermənistanın baş naziri Nikol Paşinyan bir neçə gün əvvəl gürcü həmkarı ilə sərhəddə görüşüb. Lakin görüş barədə açıqlama verilməyib. Paşinyanın Gürcüstan baş naziri ilə qısa zaman ərzində ikinci dəfə görüşü təəccüblə qarşılanıb. NATO-nun Gürcüstanda təlim keçirdiyi günlərdə Gürcüstanın baş nazirini sərhəddə erməni həmkarı ilə görüşməyə nə vadar edirdi?
Tanınmış politoloq Elxan Şahinoğlu deyib ki, Paşinyan sərhəddə Ermənistanla Gürcüstan arasında xeyli birgə iqtisadi layihələrin müzakirə olunduğunu bildirib. Əsas da nəqliyyat layihələrini və logistik mərkəzlərin tikintisini gündəmə gətirib:
"Bu arada Paşinyanın Gürcüstanla əməkdaşlığa dair bu cümləsi diqqəti cəlb edir:
"İki ölkə arasındakı əlaqələri geosiyasi təsirlərin kənarında saxlamaq olur, ancaq daha böyük layihələr müzakirə olunarkən geosiyasi təsirlər ön plana çıxır”. Paşinyanın bu cümlədə nə demək istədiyini anlamağa çalışaq.
Baş nazir geosiyasi təsirlər dedikdə böyük ehtimalla iki ölkəni nəzərdə tutur – Rusiya və Azərbaycan. Paşinyan anlayır ki, Ermənistan-Gürcüstan əlaqələrini Rusiyanın təsirlərinə görə inkişaf etdirmək çətindir. Rusiya ilə Gürcüstan arasında diplomatik münasibətlərin olmaması Ermənistanın Gürcüstan üzərindən Rusiya ilə əlaqələrinə mənfi təsir edir. Təbii ki, burada Azərbaycan amili də var. Gürcüstanın əsas regional layihələri Azərbaycan və Türkiyə ilə bağlıdır.
Ermənistan bu durumu dəyişmək gücündə deyil. Deməli, Paşinyanın bu vəziyyətdə məqsədi Rusiya və Azərbaycan təsirlərindən kənarda Gürcüstanla əməkdaşlığı inkişaf etdirməyin yollarını tapmaqdır”. Analitikə görə, Ermənistanla hansı istiqamətlərdə əməkdaşlıq etmək Gürcüstanın daxili işidir: "Ancaq Gürcüstanda onu da bilməlidirlər ki, bu əməkdaşlıq Azərbaycanda xoş qarşılanmır. Tiflis Paşinyanın da işarə etdiyi geosiyasi təsirləri nəzərə almalıdır. Bunun üçün isə Bakıdan Tiflisə zaman-zaman mesajlar göndərilməlidir”.
İsmayıl
