Bu gün Azərbaycanın Xalq şairi, xalqın şairi Nəriman Əliməmməd oğlu Həsənzadənin doğum günüdür.
1931-ci il bu günündə Qazax rayonunun Poylu qəsəbəsində anadan olan, bir-birindən gözəl şeirlər, epik-dramatik poemalar, publisistik yazılar müəllifi kimi tanınan Nəriman Həsənzadə Azərbaycan xalqının maddi-mədəniyyət xəzinəsinin ağır bir dəyəridir. Nəriman Həsənzadə sözün həqiqi mənasında ruh, sevgi, eşq şairidir. Onun yazdığı şeirlərdən qopan hər bir sözdə bir həyat eşqi var. Hər bir kəlməsi insanın xəyallarını reallıqlara birləşdirir. Nəriman Həsənzadə yaradıcılığına baş vurub onun yazdqlarını incələyən, oxuyan, öyrənən istənilən şəxs qeyrilərindən eşq, sevgi, məhəbbət, duyumluluq baxımından daha dolğun olur. Çünki şairin üzündəki nur, daxilindəki sevgi, xəyallarındakı eşq qəlbindən qələminə, qələmindən isə kağıza süzülərək bizlərin də gözləri vasitəsilə könlümüzə, ruhumuza süzülür.
Bəzən insan kiçicik bir duyğulara qərq olanda Tanrıya min şükürlər edir ki, nə yaxşı ki, bu dünyamızın Nəriman Həsənzadəsi var. Nə yaxşı ki, könüllərin eşq, sevgi, sülh carçısısı var. Nə yaxşı ki, dünyamız hər zərrəsi ilə böyük cahanı nurlandıran Nəriman Həsənzadə sözləri ilə bəzənib. Nə yaxşı ki, Nəriman Həsənzadə ilə bir dövrdə yaşamaq şansı ilə mükafatlandırılmışıq.
Nəriman Həsənzadənin yaradıcılığına verilən çoxlu sayda dövlət və hökumət təltifləri, fəxri adları vardır. Lakin bütün bunlarla yanaşı, Nəriman Həsənzadənin yaradıcılığına verilən ən böyük dəyər ulu öndər Heydər Əliyevin təbirincə desək XALQ SEVGİSİDİR. Əminəm ki, min il sonra da Nəriman Həsənzadə belə seviləcək, belə anılacaq, belə dəyərləndirəcək. Necə ki, Nizami, Füzuli, Nəsimi, Cavid, Sabir, Vurğun, Müşfiq, Zəlimxan sevilir, Nəriman da elə seviləcək. Çünki Nəriman Həsənzadənin yazdığı şeirlər hər dövrün rənginə, ruhuna uyğundur. Hər zaman Nəriman Həsənzadə şeiriyyətində, yaradıcılığında öndə sevginin, məhəbbətin, ruhun qalibiyyət, hüriyyət, azadlıq təntənəsi gəlir. O kədər içərisindən sevinci, qəm içərisindən eşqi, köz içərisindən alovu, tikan içərisindən gülü ucalda bilən şairdir. Nəriman Həsənzadə şəxsiyyətin kamilliyinin yüksəlişinin aliliyini, enişinin isə əzabını oxucuya fitrən ötürə bilən şairdir. Onun yaradıcılığı ruhun aşağı sonsuzluqla yuxarı sonsuzluğunun daxilində sərhədsiz bir sonsuzluqda qərar tapıb. O, dahi Nizaminin, Hasanoğlunun, Füzulinin, Nəsiminin, Səməd Vurğunun yaratdığı söz dünyasına daha gözəl axar verərək sözün qüvvəsi ilə sevgi, məhəbbət, eşq düyünlərini açaraq ruhun ülviyyətini göylərə ucaltmışdır.
Nəriman Həsənzadə nuru hər yerdən, hər yandan, hər tərəfdən görünən işıqlı bir zərrədir. O zərrə yüzlərlə soyuq qəlbə hənirti gətirən, minlərlə öləzimiş xəyala sürət verən, milyonlarla qaynayan ruha dinclik verən Tanrı nurudur. Dahilər əbəs yerə deməyiblər ki, şairlər Peyğəmbərlərdən sonra gələn ali insan seçilmişidirlər. Bizim Nəriman Həsənzadə də peyğəmbər simalı, peyğəmbər niyətli, peyğəmbər sevgili bir insandır.
Əzizimiz Nəriman müəllim, nə yaxşı ki siz varsınız, nə yaxşı ki bizimləsiz, nə yaxşı ki bizdən sonra gələnlərinsiniz.
Sizin titullarınızın sırasına yeni bir ad, yeni bir təltif də əlavə olunub - GƏLƏCƏYİN SEVİMLİ ŞAİRİ!
Son olaraq isə bir epiloq demək istəyirəm
MƏN sənsiz ölərəm demişdim SƏNə,
Hamısı yalanmış, yaşadım SƏNsiz...
bu misraların müəllifi Nəriman Həsənzadənin ölümdən danışmağa belə heç bir haqqı yoxdur. Çünki o, hər kəlməsi ilə ölümsüzlük qazanmış, uca məqamlaradək yüksəlmiş kamil şəxsiyyətdir.
Doğum gününüz, 88 yaşınız mübarək olsun, Nəriman müəllim!
