ABŞ-ın Azərbaycandakı səfiri Robert Sekuta deyib ki, Amerika vasitəçi ölkə kimi münaqişə tərəflərini bir araya gətirərək Dağlıq Qarabağ probleminin sülh yolu ilə həlli üçün əlindən gələni edir. Münaqişənin başlanmasından 30 il ötdüyünü xatırladan səfir bildirib ki, keçmişi xatırlamaq və ibrət dərsi almaq vacibdir:
"Biz ABŞ hökuməti olaraq Azərbaycanın məcburi köçkün əhalisinə yardımı davam etdirəcəyik”. Əslində həmsədr dövlət və super güc olaraq Amerikanın münaqişədə daha aktiv rol oynaması hamımızın çoxdankı arzusudur. Ancaq təəssüflər olsun ki, Vaşinqton əsas təşəbbüsü məlum səbəblərdən birbaşa Rusiyaya verib. Moskvanın isə münaqişənin həlli ilə bağlı mövqeyi bəllidir. Görəsən, nə vaxtsa Amerika "məcburi köçkünlərə yardım etməkdən” daha irəliyə gedə biləcəkmi?
Mövzu ilə bağlı "Şərq”ə danışan siyasi elmlər namizədi, politoloq Zaur Məmmədov deyib ki, rəsmi Bakı ABŞ və Rusiya kimi dövlətlərdən münaqişənin nizamlanması ilə bağlı konkret tədbirlər gözləyir:
"Bu gün Ermənistana Moskva və Vaşinqtonun tutduğu mövqe sərf edə bilər. Çünki bu ölkə işğalçıdır. Lakin Azərbaycan işğaldan əziyyət çəkən tərəfdir. Hələlik, ATƏT-in Minsk Qrupunun həmsədr dövlətləri işğalçı ilə işğala məruz qalan tərəf arasında heç bir fərq görmürlər. Azərbaycan 1994-cü ildən başlayaraq, ABŞ-la münasibətlərin daha da genişlənməsində maraqlı olub. Əsrin müqaviləsinin imzalanması, Avropanın enerji təhlükəsizliyində Azərbaycanın önəmi, 11 sentyabr hadisələrindən sonra Amerikanın beynəlxalq terrorizmlə mübarizəsi çərçivəsində Əfqanıstandakı və İraqdakı əməliyyatlarında Bakının oynadığı rol hamıya məlumdur”.
Analitik bildirib ki, Obama administrasiyası dövründə ABŞ-Azərbaycan münasibətlərində bir qədər soyuqlaşma və gərginlik var idi:
"Ümid edirik, Tramp administrasiyası Qarabağ probleminə öz diqqətini əsirgəməyəcək. Çünki münaqişənin nizamlanması ilə bağlı nə qədər çox böyük dövlətlər səy göstərərsə, effekti də o qədər çox olar. Qarabağ münaqişəsinin nizamlanması ilə bağlı sadəcə bir faktı müşahidə edirik. Dünyanın bütün hərbi münaqişələrində fikir ayrılığı yaşayan Rusiya və ABŞ bizim məsələmizdə həmrəylik nümayiş etdirirlər”.
İsmayıl
