Ölkəmizə iş məqsədilə gələn Türkiyə vətəndaşlarının sayında xeyli azalma var. Türkiyə Məşğulluq Xidmətindən bildirilib ki, ötən ilin analoji dövrü ilə müqayisədə türklərin sayı 80,88 faiz azalıb.
Qeyd olunub ki, göstərilən dövrdə xidmətin dəstəyi ilə Azərbaycana 26 Türkiyə vətəndaşı gəlib. Bu, 2017-ci ilin analoji dövrü ilə müqayisədə 110 nəfər azdır.
Türkiyə vətəndaşı olan işçi qüvvəsinin say azlığı ilə bağlı "Şərq”ə danışan iqtisadçı-ekspert Natiq Cəfərli bildirib ki, türklərin sayının azalması ölkəmizdə böyük layihələrə son qoyulması ilə bağlıdır:
"Çünki 2010-cu ildən başlayaraq ölkəmizdəki iri layihələrdə bir çox türk şirkətləri aktiv iştirak edirdilər. Bununla türk mütəxəssislərinin və işçi qüvvəsinin Azərbaycanda işləməsinin şahidi olurduq. Məsələn, Olimpiya Stadionunun tikintisində minlərlə türk vətəndaşı çalışırdı. Yəni bu iri layihələrin bitməsi artıq türk mütəxəssislərinin və Türkiyədən gələn işçi qüvvəsinin sayının azalmasına təsir göstərdi. Qlobal səbəb olaraq bunu göstərmək olar.
İkinci səbəb ölkəmizdə ümumi iqtisadi aktivliyin azalması ilə bağlıdır. Böyük layihələrin və iqtisadi aktivliyin azalması işçi sayının da azalmasına ciddi təsir göstərdi. Bildiyim qədərilə "Tekven”in böyük layihələrinin əksəriyyəti bitib.
Azərbaycanda ən çox işçi qüvvəsini cəlb edən isə məhz "Tekven" şirkəti idi. Onların böyük layihələri sona çatır deyə, bu, türk işçilərinin Azərbaycandan getməsinə səbəb olur. Həmçinin yerli mütəxəssislərimizin də sayında müəyyən artımlar var. Xarici ölkədə oxuyan şəxlsər ölkəmizə geri dönüblər. Əvvəllər xarici mütəxəssislərə ehtiyac duyulurdusa, artıq bəzi şirkətlər yerli işçilərimizlə razılaşmağa başlayıblar”.
Yeganə Bayramova
