"Bələdiyyə seçkiləri Türkiyədə parlament seçkisindən əhəmiyyətsiz sayılmır. Hətta siyasi baxımdan daha vacib hesab olunur”.
Bunu "Şərq”ə açıqlamasında siyasi elmlər namizədi, Bakı Politoloqlar Klubunun rəhbəri Zaur Məmmədov deyib. Politoloq bildirib ki, partiyaların parlament və prezident seçkisində qalib gəlməsi, sosial bazalarını formalaşdırması və seçicilərlə ünsiyyəti daha da dərinləşdirməsi üçün bələdiyyə seçkiləri olduqca əhəmiyyətlidir:
"Xüsusən böyük şəhərlərdə bələdiyyələrə sahib olmaq qarşıdakı digər seçkilərdə qələbə qazanmaq üçün mühüm rol oynayır. Ona görə də İstanbul və Ankara uğrunda ciddi mübarizə gedir. Məlumdur ki, indiyə qədər bələdiyyə seçkisində ən böyük partiyalar qalib gəlib. Seçkidə konkret hansı siyasi ittifaqın qalib gələcəyi seçki başa çatdıqdan sonra müəyyən olacaq. Sadəcə vurğulamaq istəyirəm ki, Türkiyənin hansısa müxalif partiyasının HDP ilə müttəfiq olması çox böyük yanlışlıq və xəyal qırıqlığıdır. Çünki HDP heç də bəyan etdikləri kimi təmsil etdikləri etnik sosial qrupların partiyası deyil. Bu partiyanın başında duran şəxslər birbaşa terrora, PKK-ya dəstək verən şəxslərdir”.
Analitikin sözlərinə görə, HDP rəhbərləri özləri də PKK ilə əlaqədə olduqlarını açıq şəkildə dilə gətirirlər:
"Belə çıxır ki, HDP ilə ittifaq quran siyasi qüvvələr terrora dəstək verənlərin əməllərinə ortaq olurlar. Bu məqam bir çox suallar yaradır. Reallıq odur ki, Türkiyə əhalisinin böyük hissəsi hakim AKP və MHP-nin qurduğu "Cümhur İttifaqı”nın tərəfdarıdır və onların dəstəkçisidir. Qardaş ölkədə son dönəmlər keçirilən seçkilərdə və Prezident Ərdoğana göstərilən etimadda bu reallığın dəfələrlə şahidi olmuşuq”.
İsmayıl
