Sərnişindaşıma qaydalarının pozulması hallarına qarşı dövlət yol polisi əməkdaşları mütəmadi tədbirlər həyata keçirirlər, amma bu məsələyə digər qurumlar da nəzarət etməlidir.
Bunu Baş Dövlət Yol Polisi İdarəsinin mətbuat xidmətinin rəhbəri Kamran Əliyev bu gün səhər saatlarında Bakı-Sumqayıt yolunda çoxsaylı şəxsin ölməsi və yaralanması ilə nəticələnən qəza ilə bağlı Trend-ə açıqlamasında bildirib.
K.Əliyev əlavə edib: "Qəza törədən mikroavtobus nəzarət postundan keçib. Lakin pik saatlar olduğundan ola bilsin ki, əməkdaşlarımızın diqqətindən yayınıb. Çünki yol polisi təkcə sərnişin daşınmasına nəzarət etmir. O qədər qayda pozuntuları olur ki, həmin pozuntulara nəzarət olunan halda bir mikroavtobusun içərisində 2 nəfər artıq sərnişinin olması gözdən yayına bilər. Dayanacaqlarda sərnişinlərin minib-düşməsinə nəzarət olunmalıdır. Bununla bağlı aidiyyəti qurumlar var. Bu səlahiyyətlər yol polisi ilə yanaşı, digər əlaqədar qurumlara da həvalə olunub. Hazırda faktla bağlı cinayət işi başlanıb, istintaq gedir. Qaranlıq məqamlara istintaq aydınlıq gətirəcək”.
