"Kasıb şagird və tələbələrin nəqliyyat vasitələrindən güzəştli istifadə etməsi geniş yayılmış təcrübədir. Bir çox ölkələrdə bu təcrübədən istifadə edirlər. Həm tələbələr üçün, həm də şagirdlər üçün ayrıca gediş haqları nəzərdə tutulur və güzəştli şərtlərlə ödənilir”.
Bu barədə "Sherg.az”a iqtisadçı- ekspert Natiq Cəfərli İnsan Hüquqları üzrə Müvəkkil (Ombudsman)Elmira Süleymanovanın kasıb şagird və tələbələrin nəqliyyat vasitələrindən güzəştli istifadə etməsi təklifi ilə bağlı danışarkən bildirib.
Ekspertin sözlərinə görə, təcrübə də göstərir ki, xərclərin bir hissəsini ya dövlət, ya da bələdiyyələr öz üzərinə götürür:
"Çünki bir çox ölkələrdə ictimai nəqliyyatın əsas tənzimləyici orqanı bələdiyyələrdi. Və onların büdcəsində tələbə və şagirdlər üçün xüsusi ödənişlərlə və yaxud da xüsusi yanaşma ilə ödəniş kartları olur. Bir çox ölkələrdə hətta gediş haqqına təqribən 70 faiz güzəşt tətbiq olunur. Bu da onların ailə büdcəsinə müsbət təsir göstərir”
N.Cəfərli həmçinin bu təklifin həyata keçirilməsinin mümkün olduğunu vurğulayıb:
"Azərbaycanda bu tətbiq etmək təbii ki, lazımdır. Bunun üçün yetərincə imkanlar var. Nəqliyyat sahəsinə dövlət büdcəsindən kifayət qədər vəsait ayrılır. Sadəcə, ayrılan bu vəsaitin effektiv xərclənməsi üçün daha ciddi nəzarət mexanizimləri qurulmalıdır. Tələbələrin və şagirdlərin ictimai nəqliyyatdan istifadə etməsi üçün həftəlik, aylıq, hətta illik güzəştli şərtlərlə gediş haqqının qəbul olunmasına qərar verilə bilər”.
Sevda Ulutau
