Ermənistan tərəfinin girov götürdüyü həmvətənlərimiz Dilqəm Əsgərov və Şahbaz Quliyevin dərhal Azərbaycana və ya 3-cü ölkəyə təhvil verilməsi ilə bağlı Avropa İnsan Haqları Məhkəməsi qarşısında vəsatət qaldırılıb.
Girovların hüquqlarını müdafiə edən vəkil Anar Bağırov bildirib ki, beynəlxalq məhkəmədən gözlənilən qərarın müsbət olacağına ümid və əsas çoxdur. Vəkilin sözlərinə görə, bir sıra dövlətlərə qarşı analoji işlər üzrə müvafiq qərarlar qəbul edilib: "İş tam perspektivlidir, inanırıq ki, bu məsələdə Avropa Məhkəməsi ədalətli mövqe nümayiş etdirəcək”. A.Bağırov söyləyib ki, Həsən Həsənov heç də erməni tərəfinin bəyan etdiyi kimi uzaq məsafədən açılan atəş nəticəsində deyil, işgəncə verilərək öldürülüb. Bununla bağlı məhkəmə tibbi ekpertizasının rəyi var. Bu materiallar da Avropa İnsan Hüquqları Məhkəməsinə təqdim ediləcək. Məsələyə münasibət bildirən Qarabağ Azadlıq Təşkilatının sədri Akif Nağı beynəlxalq təşkilatlara inam qalmadığını desə də, bu qədər faktın qabağında məhkəmənin biganə qalmayacağına ümid edir: "Hər zaman işğalçı Ermənistanın maraqlarını müdafiə edən beynəlxalq məhkəmələr Azərbaycan tərəfinin müraciətlərinə obyektiv cavab vermir. Amma hər halda faktlar, dəlil-sübutlar ortadadır. Artıq beynəlxalq aləm də dərk edir ki, ermənilər haqsızdır. Ermənistanın girovlarımıza qarşı qeyri-insani davranışları dünyanın gözü qabağında edilir. Həmçinin, Qərb dövlətləri girovlar məsələsinin Ermənistan-Azərbaycan arasındakı gərginliyi daha da artırdığını görürlər. Ona görə, azacıq da olsa, Avropa Məhkəməsinin obyektiv qərar qəbul edəcəyinə ümidimiz var. Hesab edirəm ki, təcavüzkar Ermənistan dövləti Həsən Həsənovun öldürülməsinə də cavab verməlidir. Fərqi yoxdur, o, yaxın və ya uzaq məsafədən qətlə yetirilib. Əgər ortada ölüm hadisəsi varsa, düşmən tərəf məsuliyyət daşıyır. İstənilən halda prosesdə haqlı tərəf Azərbaycandır”.
A.Nağı girovlarımızın üçüncü ölkəyə göndərilməsinin haqlı qərar olmayacağını deyir: "Çünki onlar hansısa xarici ölkənin ərazisinə girməyiblər, heç kimi öldürməyiblər. Əgər girovlar barəsində üçüncü ölkəyə göndərilmə qərarı çıxarsa, bu, yarım ədalət olacaq. Ona görə ki, üçüncü ölkəyə göndərilmə qismən də olsa, girovlarımızın günahkar olduğunu təsdiqləyəcək. Amma yenə də bu qərar Ermənistanın ifşa olunmasına səbəb olacaq”.
İsmayıl
