Ağsu Rayon Mərkəzi Xəstəxanasında uşaq ölümü baş verib. Rayon sakini 27 yaşlı Çinarə Nəbiyevanın övladı təbii doğuşla dünyaya gəldikdən sonra ağır anlar yaşayıb. Uşaq doğulduqdan 40-50 dəqiqə sonra dünyasını dəyişib.
Qadının həyat yoldaşı bildirib ki, Çinarə Nəbiyeva müayinə üçün bir neçə gün müntəzəm olaraq xəstəxanaya aparılıb. Həkimlər uşağın ana bətnində normal olduğunu deyiblər.
Şamama Mahmudova - Uşağın nənəsi: "Uşaq doğulandan 40-50 dəqiqə sonra öldü. Mən təkidlə dedim ki, gedim uşağa baxım. Gördüm burnuna nəsə qoşublar. Amma uşağın rəngi çox da qaralmamışdı. Dedilər beyninə hava getməyib. Ürək döyüntüsünün olduğunu da dedilər. Üstündən 10-15 dəqiqə keçdi, dedilər ki, uşaq ölüb. Başım çıxmır, niyə belə oldu". Faktla bağlı rayon prokurorluğuna müraciət edilib.
Məsələyə münasibət bildirən pediyatır Vaqif Qarayev "Sherg.az”a bildirib ki, olayın baş vermə səbəbini bilmək üçün hadisəni ətraflı arşdırmaq lazımdır:
"Daha bir uşağın dünyasını dəyişməsi həqiqətəndə üzücüdür. Bu hadisənin müxtəlif səbəbləri ola bilər. Düzdür, valideyinlər olayla bağlı müəyyən iradlar bildirirlər, uşağın dünyasını dəyişməsində həkimləri günahlandırırlar. Körpənin ailəsinin belə ittihamları səsləndirməsi normaldır. Onkoloji xəstə belə dünyasını dəyişəndə onun ailəsi də həkimdə səhv axtarır. Həkimlər körpənin başına oksigen getməməsindən dolayı dünyasını dəyişdiyini bildirir. Bu mümkün ola bilər. Çünki beyinə oksigen getməsinə bir çox faktorlar əngəl olur. Məncə, ilk əvvəl hər iki tərəf dinlənilməlidir. Sonrada doğum prosesi ilə bağlı araşdırmalar aparılmalıdır. Beləliklə də əldə edilən nəticəyə əsasən körpə ölümünə səbəb olan tərəf cəzalandırılmalıdır. Lakin hadisənin səbəbləri bilinmədən tərəflərin bir-birini ittiham etməsi düzgün deyil”.
Kənan Eynuroğlu
